Գերմանական «Quantum Systems» ռազմական տեխնոլոգիաների ընկերությունը հաստատել է, որ ենթարկվել է կիբերհարձակման, որի հետևանքով Գերմանիայի զինված ուժերը ժամանակավորապես դադարեցրել էին ընկերության արտադրած անօդաչուների շահագործումը։ Այս մասին հայտնում է Euronews-ը։
Հարձակումը հայտնաբերվել է դեռ հոկտեմբերի վերջին։ Ընկերության փոխանցմամբ՝ անհայտ հակառակորդները փորձել են ներթափանցել ներքին տեղեկատվական համակարգեր, սակայն կիբերանվտանգության մասնագետներին հաջողվել է կանխել սպառնալիքը։
Գերմանական բանակը անվտանգության նկատառումներով որոշ ժամանակ դադարեցրել էր սարքերի թռիչքները, սակայն այժմ դրանք կրկին շահագործվում են։
Ընկերությունը ռազմական անօդաչուներ է մատակարարում նաև Ուկրաինային։ Միջադեպի հանգամանքները շարունակում են ուսումնասիրվել իրավասու մարմինների կողմից։
