ԵՄ երկրները հաստատել են Պարսից ծոցի երկրների հետ համագործակցության վերաբերյալ բանակցությունների մեկնարկը՝ ԱՄՆ նախագահ Դոնալդ Թրամփի վարչակազմի կողմից մաքսատուրքերի սահմանման սպառնալիքների ֆոնին, հաղորդում է Bloomberg-ը՝ հղում անելով իրազեկ աղբյուրներին։
«ԵՄ անդամ պետությունները հաստատել են Պարսից ծոցի վեց պետությունների հետ բանակցությունների մեկնարկը, քանի որ դաշինքը ձգտում է ընդլայնել իր միջազգային գործընկերությունները Թրամփի կողմից մաքսատուրքեր սահմանելու սպառնալիքների ֆոնին», - ասվում է հաղորդագրության մեջ։
ԵՄ արտաքին գործերի նախարարները ուրբաթ օրը համաձայնության են եկել ռազմավարական գործընկերության համաձայնագրերի շուրջ բանակցություններ վարել Բահրեյնի, Քուվեյթի, Օմանի, Կատարի, Սաուդյան Արաբիայի և Միացյալ Արաբական Էմիրությունների հետ, հայտնել են աղբյուրները: ԵՄ-ն ակնկալում է, որ բանակցությունները կսկսվեն «հնարավորինս շուտ» և կներառեն մի շարք հարցեր՝ անվտանգությունից մինչև էներգետիկա, հաղորդում է Bloomberg-ը:
