Կոլումբիայի նախագահ Գուստավո Պետրոն հայտարարել է, որ եթե ԱՄՆ իշխանությունները չեն ցանկանում լուծել միգրանտների իրավունքների հարցերը, ապա տրամաբանական կլինի Նյու Յորքում գտնվող Ազատության արձանը տեղափոխել Լատինական Ամերիկայի տարածք։
«Նրանք իրենց համարում են գերազանց ռասա՝ լինելով սպիտակամորթ։ Բայց ազատության համար պայքարողները սևամորթներ էին, որոնք հիմնադրեցին Ամերիկայում առաջին ազատ տարածքը», - երկրի առաջնորդի խոսքերն է մեջբերում տեղական «Սեմանա» թերթը։
«Եկեք համաձայնության գանք, թե ինչն է իսկապես կարևոր՝ ժողովրդավարությունն ու ազատությունը։ Հակառակ դեպքում, Նյու Յորքից այս արձանը պետք է տեղափոխվի Կարտախենա»։
Պետրոն քննադատել է ԱՄՆ-ի հակամիգրացիոն միջոցառումները, այդ թվում՝ Ֆլորիդայում անօրինական ներգաղթյալների համար կալանավայրի կառուցումը՝ կոկորդիլոսներով և այլ վտանգավոր կենդանիներով լի տարածքում։
«Դեմոկրատներն արդեն ասել են. սա մարդկության դեմ հանցագործություն է, խնդրում եմ, մի՛ կատարեք այն։ Սա ժողովրդավարության և ազատության մասին է», - ասել է նախագահը։
