Իսրայելի կողմից Գազայի հատվածի շարունակական շրջափակման պատճառով սովից մահացած պաղեստինցի երեխաների թիվը հասել է 68-ի, հաղորդում է կատարական «Ալ Ջազիրա» հեռուստաալիքը։
Հեռուստաալիքը, հղում անելով Մերձավոր Արևելքում Պաղեստինի փախստականների հարցերով ՄԱԿ-ի օգնության և աշխատանքների գործակալության (UNRWA) աշխատակիցներին, հայտնում է, որ յոթ ամսական աղջիկը մահացել է բուժման ընթացքում։
Անցյալ շաբաթվա վերջին Գազայի իշխանությունները հայտարարեցին, որ առնվազն 67 երեխա մահացել է թերսնումից այն բանից հետո, երբ Իսրայելը սկսեց պատերազմը պաղեստինյան անկլավի դեմ: Պատերազմը և Իսրայելի շրջափակումը Գազայի 2.1 միլիոն մարդու սովի եզրին են հասցրել, նշում է «Ալ Ջազիրան»:
Իր հերթին, ՄԱԿ-ի մանկական հիմնադրամը (ՅՈՒՆԻՍԵՖ) հայտարարել է, որ հունիսին Գազայում ավելի քան 5,8 հազար երեխաների մոտ ախտորոշվել է թերսնում, որոնցից ավելի քան 1000-ը գտնվում են ծանր վիճակում:
«Սա միայն սննդային ճգնաժամ չէ: Սա երեխաների գոյատևման արտակարգ իրավիճակ է», - նշել է ՅՈՒՆԻՍԵՖ-ը:
