Միացյալ Նահանգները ստացել է Բեյրութի պատասխանը լիբանանա-իսրայելական կարգավորման առաջարկվող «ճանապարհային քարտեզի» վերաբերյալ, որը համապատասխանում է Վաշինգտոնի սպասումներին, Բաաբդա պալատում կայացած մամուլի ասուլիսում հայտարարել է Մերձավոր Արևելքի հարցերով ԱՄՆ հատուկ ներկայացուցիչ Թոմ Բարաքը։
«Մենք օգտակար բանակցություններ ունեցանք Լիբանանի նախագահ Ջոզեֆ Աունի հետ և գոհ ենք խաղաղության առաջարկներին ստացած արձագանքից։
Այս արձագանքը համապատասխանում է մեր սպասումներին, որի շրջանակներում մենք իրականացնում ենք միջնորդական քայլերը», - ասել է ամերիկացի դիվանագետը։
Նրա խոսքով՝ Միացյալ Նահանգները «կշարունակի մշակել խաղաղության ծրագիր, որը կպահանջի երկխոսության մեջ մտնել»։
«Իսրայելը խաղաղություն է ցանկանում Լիբանանի հետ, բայց մեզ համար մարտահրավերը մնում է այն, թե ինչպես հասնել դրան», - ընդգծել է Բարաքը։
Ամերիկացի դիվանագետը պնդել է, որ Միացյալ Նահանգները Լիբանանին չի թելադրում, թե ինչ պետք է անի շիական «Հեզբոլլահ» շարժման հետ կապված։
«Որոշումը պատկանում է հենց լիբանանցիներին, ովքեր պետք է մի կողմ դնեն իրենց տարաձայնությունները և օգտվեն հնարավորությունից՝ իրենց երկիրը կրկին Արևելքի մարգարիտը դարձնելու համար», - ասել է նա։
