Ռուանդան և Կոնգոյի Դեմոկրատական Հանրապետությունը Վաշինգտոնում խաղաղության պայմանագիր են կնքել։ Դրա համաձայն՝ Կոնգոյի Դեմոկրատական Հանրապետության արևելքում շարունակվող հակամարտությունը կդադարեցվի, Միացյալ Նահանգներն էլ այդ երկրի տարածքում օգտակար հանածոներ արդյունահանելու իրավունք կստանա։
Փաստաթղթի ստորագրման պաշտոնական արարողությանը ներկա են եղել ԱՄՆ պետքարտուղար Մարկո Ռուբիոն և Կոնգոյի Դեմոկրատական Հանրապետության ու Ռուանդայի արտաքին գործերի նախարարները։
Խաղաղության համաձայնագիրը հիմնված է երկու աֆրիկյան երկրների կողմից 2025 թվականի ապրիլին հաստատված հռչակագրի վրա: Նշվում է, որ կողմերը պարտավորվում են «հարգել միմյանց տարածքային ամբողջականությունը» և դադարեցնել Կոնգոյի Դեմոկրատական Հանրապետության արևելքում ռազմական գործողությունները, որոնք սրվել էին M23 խմբավորման հարձակումից հետո: Հարկ է նշել, որ Ռուանդան հերքում է խմբավորմանն աջակցելու համար Կիգալիին ներկայացվող մեղադրանքները:
