Այսօր Մայր Աթոռ Սուրբ Էջմիածնում վաղուց ի վեր ծրագրավորված էր կազմակերպելու Հայաստանյայց բոլոր թեմերի քահանայից հավաքը: Այս մասին, այսօր՝ հունիսի 27–ին, լրագրողների հետ զրույցում ասել է Մայր Աթոռ Սուրբ Էջմիածնի Արտաքին հարաբերությունների և արարողակարգի բաժնի տնօրեն Նաթան արքեպիսկոպոս Հովհաննիսյանը:«Տարիներ շարունակ այդ հավաքը ղեկավարում է Միքայել Սրբազանը: ժամը 11:00-ին պիտի ժողովը ունենայինք, մինչև, որ իմացանք, որ այդպիսի գործողություններ են տեղի ունենալու:
Մենք՝ որևէ մեկս, չենք ընդունում այդ գործողությունների իրավականությունը ու հատկապես՝ ձևը:Միքայել Սրբազանն ազնվորեն իր ազնվական որոշումն արեց, որ ինքը պիտի գնա, որովհետև ինքը նախևառաջ հանցագործ չէ և ինքը կգնա, եթե կարող են հաստատել նրա հանցագործությունները, այդ պարագայում ուրիշ գործողություններ կլինեն:Մենք բոլորս հարգում ենք նրա որոշումը, որովհետեւ ամենալավ պայքարը արժանապատիվ պայքարն է և երբեւէ Միքայել Սրբազանը որեւէ մեկի հետեւում չի թաքնվել։Գնացեք իմացեք իր տոհմածառը։
Աջապահյանները բոլոր ժամանակներում եղել են մեր ազգի, եկեղեցու և պետականության առաջամարտիկներ:Այսօր կատարվում է այն, ինչ կատարվեց 1915 թվականին, երբ Միքայել ծայրագույն վարդապետ Աջապահյանին թուրքերը պարզապես կտոր-կտոր արեցին»,-ասաց նա։Նաթան արքեպիսկոպոս Հովհաննիսյանը նկատեց, որ Միքայել Սրբազանը մոտեցավ ԱԱԾ–ի ավտոմեքենային, բայց ժողովուրդը նրան թույլ չտվեց նստելու ավտոմեքենան. «Այնպես որ որեւէ մեկը չի թաքնվում, փախուստ չի տալիս չիրագործած հանցագործությունից»,– ընդգծեց նա։
