Իրանը չի մտադրվում հրաժարվել խաղաղ նպատակներով ուրանի հարստացումից՝ շարունակելով կատարել միջուկային զենքի չտարածման մասին պայմանագրով ստանձնած իր պարտավորությունները, և մյուս պետությունները իրավունք չունեն այս հարցում սահմանափակել Թեհրանին։ Այս մասին հայտարարել է Իրանի փոխարտգործնախարար Մաջիդ Թախտ-Ռավանչին։
«Մենք միջուկային զենքի չտարածման մասին պայմանագրի բարեխիղճ մասնակից ենք, այս հիմքով մենք ուրան ենք հարստացնում խաղաղ նպատակներով՝ մեր երկրի բարօրության համար։ Ոչ ոք չի կարող մեզ ասել, թե ինչ պետք է անենք, քանի դեռ մենք կատարում ենք համաձայնագրով ստանձնած մեր պարտավորությունները», - ասել է Թախտ-Ռավանչին գերմանական ARD հեռուստաալիքի եթերում։
Նա նաև նշել է, որ չի պատրաստվում մեկնաբանել Իրանի միջուկային ծրագրի վիճակը հունիսի 21-ի լույս 22-ի գիշերը ԱՄՆ ռազմաօդային ուժերի կողմից հարվածներից հետո։ Միաժամանակ, փոխնախարարը ընդգծել է, որ ռմբակոծությունն ինքնին «ագրեսիայի ակնհայտ ակտ է»։
