Պակիստանի կառավարությունը հունիսի 20-ին պաշտոնապես առաջարկեց ԱՄՆ նախագահ Դոնալդ Թրամփի թեկնածությունը 2026 թվականի Նոբելյան խաղաղության մրցանակի համար։
«Պակիստանի կառավարությունը որոշել է պաշտոնապես առաջադրել նախագահ Դոնալդ Թրամփի թեկնածությունը 2026 թվականի Նոբելյան խաղաղության մրցանակի համար», - ասվում է կառավարության հայտարարության մեջ X սոցիալական ցանցում (նախկինում՝ Twitter):
Նշվում է, որ համապատասխան նախաձեռնությունը Հնդկաստանի և Պակիստանի միջև վերջերս տեղի ունեցած հակամարտության կարգավորման գործում Թրամփի «վճռական դիվանագիտական միջամտության» ճանաչման նշան է։
Կառավարությունը նաև ընդգծեց, որ Սպիտակ տան ղեկավարի գործողությունների շնորհիվ ապահովվեց հրադադար և չեզոքացվեց երկու միջուկային տերությունների միջև հակամարտության բռնկումը, որը կարող էր հանգեցնել «աղետալի հետևանքների» միլիոնավոր մարդկանց համար։
«Նախագահ Թրամփի առաջնորդությունը 2025 թվականի Պակիստան-Հնդկաստանի ճգնաժամի ընթացքում հստակ ցույց է տալիս նրա պրագմատիկ դիվանագիտության և արդյունավետ խաղաղաշինության ժառանգության շարունակականությունը», - եզրափակում է հրատարակությունը։
