Ռուսաստանը հիմք է ընդունում տեղում ձևավորվող իրողություններից և պնդում է, որ դրանք ընդունվեն, ու չի պահանջում, որ Ուկրաինան հանձնվի, հայտարարել է Ռուսաստանի նախագահ Վլադիմիր Պուտինը՝ Սանկտ Պետերբուրգի միջազգային տնտեսական համաժողովի լիագումար նիստի շրջանակում։
Նա նաև պնդել է այն դիրքորոշումը, որ ռուսներն ու ուկրաինացիները մեկ ժողովուրդ են, ուստի կարելի է համարել, որ «ամբողջ Ուկրաինան մերն է»։
«Ես արդեն բազմիցս ասել եմ, որ իրականում ռուսներին և ուկրաինացիներին համարում եմ մեկ ժողովուրդ։ Այս իմաստով ամբողջ Ուկրաինան մերն է»,- ասել Է Պուտինը՝ պատասխանելով այն հարցին, թե ուր կարող է հասնել ռուսական բանակը:
Այս հայտարարությունից հետո Ռուսաստանի նախագահը հավելել է, որ Մոսկվան երբեք կասկածի տակ չի դրել ուկրաինացի ժողովրդի անկախության և ինքնիշխանության իրավունքը։
Մեկնաբանելով այն պնդումը, որ Ռուսաստանի դիրքորոշումն Ուկրաինայի հակամարտության հարցում նույնն է, ինչ ԱՄՆ նախագահ Դոնալդ Թրամփի դիրքորոշումը՝ Իրանի միջուկային ծրագրի հարցում կապիտուլյացիայի անհրաժեշտության վերաբերյալ, Պուտինը շեշտել է. «Այս իրավիճակը նույնը չէ, այն էապես տարբեր է»։
