Թեհրանում Ադրբեջանի դեսպանատան վրա հարձակվողի մահապատիժն իրականացվել է չորեքշաբթի՝ մայիսի 21-ի առավոտյան, հայտնում է IRIB գործակալությունը։
2023 թվականի հունվարի 27-ի առավոտյան զինված հարձակում է իրականացվել Իրանում Ադրբեջանի դեսպանատան վրա։ Հարձակվողը, զինված Կալաշնիկով ինքնաձիգով, ճեղքել է անվտանգության կետը և սպանել անվտանգության ծառայության ղեկավարին, հարձակումը կանխելիս վիրավորվել են դեսպանատան անվտանգության երկու աշխատակից։
«Այսօր առավոտյան դատավճիռը ի կատար է ածվել Թեհրանում Ադրբեջանի Հանրապետության դեսպանատան վրա հարձակում գործած անձի նկատմամբ»,- ասվում է գործակալության հաղորդագրությունում։
Ապրիլի վերջին Իսլամական Հանրապետության դատական համակարգի պաշտոնական ներկայացուցիչ Ասղար Ջահանգիրին ասել էր, որ Իրանի դատական իշխանությունն ավարտել է 2023 թվականի հունվարին Թեհրանում Ադրբեջանի դեսպանատան վրա հարձակվողին մահապատժի ենթարկելու նախապատրաստական աշխատանքները։
