Իսպանիայի մի քանի շրջաններ մնացել են առանց ֆիքսված կապի և ինտերնետի՝ խոշորագույն Telefónica հեռահաղորդակցական ընկերության ցանցում տեխնիկական խափանման պատճառով, հայտնում է Antena 3 հեռուստաալիքը։
Խնդիրն ազդել է Բասկերի երկրի, Վալենսիայի, Արագոնի և Էքստրեմադուրայի վրա: Ինչպես պարզաբանել է օպերատորն ինքը, վթարի պատճառը ցանցի արդիականացման աշխատանքներն են եղել, որոնց ընթացքում տեղի է ունեցել խափանում։
«Առաջին պահից միջադեպերի կառավարման կոմիտեն ակտիվացել է, տուժած հանգույցները մեկուսացվել են, և մասնագետներն ուղարկվել են վայրեր՝ արագ միջամտության համար», - հեռուստաալիքին ասել է Telefónica-ի գործառնությունների և տեղեկատվական տեխնոլոգիաների տնօրեն Սերխիո Սանչեսը:
Նշվում է, որ հեռախոսային և ինտերնետ կապերն արդեն վերականգնվել են, բացառությամբ առանձին դեպքերի։
