ԱՄՆ-ի հետ հաջողությամբ բանակցելու համար Իրանը պատրաստ է տարբեր միջոցներ ձեռնարկել Ատոմային էներգիայի միջազգային գործակալությանը (ՄԱԳԱՏԷ) ցույց տալու համար, որ Իրանի միջուկային ծրագիրը միջուկային զենք ստեղծելու նպատակ չունի։ Այս մասին հայտարարել է Իսլամական Հանրապետության արտաքին գործերի նախարարության պաշտոնական ներկայացուցիչ Էսմայիլ Բաղային։
«Եթե մեր հակառակորդները իսկապես չեն ցանկանում թույլ տալ Թեհրանին միջուկային զենք ձեռք բերել, հաշվի առնելով, որ մեր միջուկային ծրագիրը եղել և մնում է խաղաղ, մենք պատրաստ ենք ՄԱԳԱՏԷ-ի հետ քննարկել տարբեր միջոցներ։
Մեր միջուկային ծրագիրը ոչ մի դեպքում ռազմական բնույթ չի կրի։ Բայց եթե մյուս կողմի իրական նպատակն է ամբողջությամբ փակել Իրանի միջուկային արդյունաբերությունը և դադարեցնել ուրանի հարստացումը, և առկա փաստերը հենց դա են ցույց տալիս, ապա հարցի էությունը փոխվում է, և ամեն ինչ այդպես չի աշխատի»,- ասել է դիվանագետը շաբաթական ճեպազրույցում։
Նրա խոսքով՝ «ուրանի հարստացման հարցը ոչ մի դեպքում քննարկման ենթակա չէ», իսկ Իրանը «մտադիր չէ որեւէ մեկից ուրանի հարստացման թույլտվություն խնդրել»։
Բաղաին Թեհրանի դեմ ԱՄՆ-ի պատժամիջոցներն անվանել է «հանցագործություն մարդկության դեմ և մարդու իրավունքների և ողջ Իրանի ժողովրդի իրավունքների կոպտագույն խախտում»:
