Իսրայելական անօդաչու թռչող սարքը հարվածել է մեքենային Լիբանանի հարավում գտնվող Մեյս ալ Ջաբալ և Բլիդա գյուղերի միջև ընկած հատվածում, ինչի հետևանքով երեք մարդ է զոհվել, RIA Novosti-ին հայտնել է լիբանանյան շտապօգնության ծառայության աղբյուրը։
«Անօդաչու թռչող սարքը կառավարվող հրթիռով հարվածել է երկու բնակավայրերի միջև մայրուղիով ընթացող պիկապ բեռնատարին: Հարվածի զոհ են դարձել Լիբանանի մեկ քաղաքացի և երկու սիրիացի: Հարվածի հետևանքով մեքենան ամբողջությամբ այրվել է, իսկ միջադեպի հատվածում նույնպես վնաս է գրանցվել»,- ասել է գործակալության աղբյուրը։
Իսրայելական ուժերը շարունակում են հարվածներ հասցնել Լիբանանի ներսում՝ չնայած անցյալ տարվա նոյեմբերին Հեզբոլլահի հետ ձեռք բերված հրադադարի համաձայնությանը։
Ըստ պայմանավորվածությունների՝ Իսրայելի պաշտպանության բանակը պետք է իր ստորաբաժանումները դուրս բերեր մինչև հունվարի 26-ը, սակայն դա տեղի չունեցավ։ Իսրայելական զորքերը շարունակում են մնալ լիբանանյան սահմանի երկայնքով հինգ դիրքերում:
