ԱՄՆ նախագահ Դոնալդ Թրամփի վարչակազմը ծրագրում է Սաուդյան Արաբիային առաջարկել ավելի քան 100 միլիարդ դոլար արժողությամբ ամերիկյան զենք վաճառելու գործարք, հայտնում է Reuters-ը՝ հղում անելով սեփական աղբյուրներին։ Նրա վեց զրուցակիցների խոսքով՝ հայտարարությունը նախատեսված է Թրամփի՝ թագավորություն 2025 թվականի մայիսին ծրագրված այցի ժամանակ։
Ինչպես նշում է գործակալությունը, ԱՄՆ նախկին վարչակազմը՝ Ջո Բայդենի գլխավորությամբ, երբեք չի կարողացել ավարտին հասցնել Սաուդյան Արաբիայի հետ համաձայնագիրը, որը պետք է լիներ թագավորության և Իսրայելի միջև հարաբերությունների կարգավորման գործարքի մաս։ Մասնավորապես, Թրամփի նախորդը Սաուդյան Արաբիային ավելի մեծ հասանելիություն է առաջարկել ամերիկյան առաջադեմ սպառազինության համակարգերին՝ թագավորության կողմից Չինաստանից զենք գնելուց զերծ մնալու և Պեկինին երկրում հետագա ներդրումներից արգելելու դիմաց:
Միևնույն ժամանակ, Reuters-ը չի կարողացել պարզել, թե արդյոք ներկայիս վարչակազմի առաջարկը համանման պահանջներ է պարունակում։
