Չինաստանի կառավարությունը բանակցություններ չի սկսել ԱՄՆ կառավարության հետ առևտրային հարցերի և մաքսատուրքերի վերաբերյալ։ Այս մասին հայտարարել է Չինաստանի ԱԳՆ պաշտոնական ներկայացուցիչ Գու Ցզյակունը՝ հերքելով ԱՄՆ նախագահ Դոնալդ Թրամփի՝ «ակտիվ խորհրդակցությունների մասին» խոսքերը։
«Սրանք բոլորը սուտ տեղեկություններ են: Որքան ես գիտեմ, Չինաստանը և Միացյալ Նահանգները մաքսատուրքերի հարցի շուրջ խորհրդակցություններ կամ բանակցություններ չեն վարել, առավել ևս համաձայնության չեն եկել», - ճեպազրույցում ընդգծել է Գուո Ցզյակունը:
Ինչպես պարզաբանել է Չինաստանի ԱԳՆ պաշտոնական ներկայացուցիչը, Վաշինգտոնը հանդես է եկել որպես մաքսատուրքերի պատերազմի նախաձեռնող, մինչդեռ Պեկինը «հետևողական և հստակ» դիրքորոշում ունի։
«Մենք պայքարելու ենք մինչև վերջ, բայց բանակցությունների դռները բաց են»,- հավելել է դիվանագետը։
Գուո Ցզյակունը նշել է, որ Չինաստանը պատրաստ է ԱՄՆ-ի հետ մաքսատուրքերի շուրջ երկխոսություն վարել միայն հավասար պայմաններում՝ փոխադարձ հարգանքի սկզբունքի համաձայն։
Ավելի վաղ տեղեկացրել էինք, որ ԱՄՆ նախագահ Դոնալդ Թրամփը հայտարարել է, որ ԱՄՆ-ը և Չինաստանը առևտրային հարցերի շուրջ ամենօրյա կապի մեջ են։
