Միացյալ Նահանգները մշակել է ուկրաինական հակամարտության կարգավորման շատ կոնկրետ առաջարկ. Վաշինգտոնը դուրս կգա բանակցային գործընթացից, եթե Մոսկվան ու Կիևը չհամաձայնեն իրենց առաջարկված ծրագրին։ Այս մասին լրագրողներին հայտնել է ԱՄՆ փոխնախագահ Ջ.Դ.Վենսը։
«Ժամանակն է, որ նրանք կա՛մ համաձայնեն, կա՛մ ԱՄՆ-ը դուրս գա այս գործընթացից»,- նրա խոսքերն է մեջբերում Bloomberg-ը։ ԱՄՆ փոխնախագահը Թաջ Մահալ այցելությունից հետո զրուցել է մամուլի հետ։
«Պետք է տարածքային փոխանակում լինի»,- ասել է Վենսը՝ հավելելով, որ հակամարտությունը կարգավորելուց հետո սահմանը կարող է չհամընկնել ներկայիս ճակատային գծի հետ։ Նրա խոսքով՝ այժմ երկու կողմերն էլ պետք է «դնեն զենքերը, սառեցնեն այս հարցը և սկսեն իսկապես ստեղծել ավելի լավ Ռուսաստան և ավելի լավ Ուկրաինա»։
Նա պարզաբանել է, որ ընդհանուր առմամբ, լավատեսորեն է տրամադրված հակամարտության կարգավորման բանակցություններին, ինչպես նաև ընդգծել է, որ, իր կարծիքով, մինչ այժմ կողմերը բարեխղճորեն են բանակցել։
