Պետքարտուղարության վերակազմավորումը կհանգեցնի նրա մոտ 130 գերատեսչությունների փակմանը և առնվազն 700 պաշտոնների վերացմանը։
Այս մասին հայտնում է Reuters գործակալությունը՝ վկայակոչելով արտաքին քաղաքականության գերատեսչության բարեփոխման նախնական ծրագրեր պարունակող փաստաթուղթը։
Սենատի և Ներկայացուցիչների պալատի արտաքին հարաբերությունների հանձնաժողովներին ներկայացված փաստաթուղթը դրույթներ է պարունակում Պետդեպարտամենտի 132 բյուրոների, գերատեսչությունների և ծրագրերի առաջիկա վերացման մասին. կկրճատվի 732 հաստիք, շատերը կտեղափոխվեն այլ գերատեսչություններ կամ կվերակազմավորվեն։
Մասնավորապես, ինչպես պարզաբանում է The Washington Post-ը, վերացվելու է քաղաքացիական անվտանգության, ժողովրդավարության և մարդու իրավունքների հարցերով պետքարտուղարի տեղակալի պաշտոնը։
Բացի այդ, պատերազմական հանցագործությունների, ինչպես նաև «հակամարտությունների և կայունացման գործողությունների» հետաքննության մեջ ներգրավված ծառայությունները կդադարեցնեն գործունեությունը։
Հրատարակությունը նշում է, որ Պետդեպարտամենտի բարեփոխումը, դատելով փաստաթղթում շարադրված ծրագրերից, «ոչ այնքան արմատական» կլինի, որքան սպասվում էր։
Մասնավորապես, ներկայումս չի խոսվում աֆրիկյան մայրցամաքում ամերիկյան դիվանագիտական առաքելությունների գործունեությունը սահմանափակելու և ԱԳՆ մասնագիտացված բաժինը Աֆրիկայի հարցերով հատուկ ներկայացուցչի գրասենյակով փոխարինելու մասին։
