Հապալասը նվազեցնում է «վատ» խոլեստերինի մակարդակը և բարելավում արյան շրջանառությունը ուղեղում՝ նվազեցնելով տարեցների մոտ ճանաչողական խանգարումների վտանգը: Այս եզրակացությանն են հանգել Վիեննայի համալսարանի Wiener Kinderstudien լաբորատորիայի գիտնականները։ Հետազոտության արդյունքները հրապարակվել են Nutrition Research (NutriRes) ամսագրում:
Հետազոտությանը մասնակցել են 60 տարեկանից բարձր 55 կամավորներ՝ նորմալ զարկերակային ճնշմամբ և ավելորդ քաշով, ովքեր վարում էին նստակյաց կենսակերպ: Փորձարկվողներին բաժանել են երկու խմբի՝ առաջինը օրական երկու անգամ հապալասի փոշիով ըմպելիք է օգտագործել, իսկ երկրորդը՝ պլացեբո: Ըմպելիքում հապալասի պարունակությունը համարժեք էր 1,5 բաժակ թարմ հատապտուղների։ Մասնակիցները նաև թեթև վարժություններ են կատարել ուսումնասիրության ողջ ընթացքում:
Արդյունքները ցույց են տվել, որ առաջին խմբի մասնակիցների մոտ նկատվել է LDL («վատ» խոլեստերինի) նվազում, ինչպես նաև եղել է HDL մասնիկների և ApoA-I սպիտակուցի մակարդակի սպեցիֆիկ փոփոխություն։ ApoA-I (Apolipoprotein A1) ծառայում է որպես «լավ խոլեստերինի»՝ բարձր խտության լիպոպրոտեինների հիմնական կրող: Այն խոլեստերինը տեղափոխում է անոթներից լյարդ և վերահսկում է թիթեղների առաջացումը:
Նրանք, ովքեր խմում էին հապալասի ըմպելիքը, ունեին նաև աղիքների Coriobacteriales incertae sedis բակտերիաների մակարդակը, որոնք ներգրավված են հապալասում հիմնական հակաօքսիդանտների՝ անտոցիանինների և պոլիֆենոլների մշակման մեջ: Գիտնականները բացատրել են, որ անտոցիանինները բարելավում են ուղեղի արյան մատակարարումը և նվազեցնում բջջային օքսիդատիվ սթրեսը: Այս ազդեցությունը կարող է դանդաղեցնել տարիքի հետ կապված ճանաչողական կարողությունների անկումը, ինչպիսիք են հիշողությունը և ուշադրությունը:
Գիտնականները հավելել են, որ հապալասը հարուստ է C և K վիտամիններով, մանգանով և բջջանյութով։ Սննդի այս բաղադրիչներն օգնում են աջակցել իմունիտետին, ոսկորների ամրությանը և մարսողությանը՝ մեծ տարիքում բարեկեցության կարևոր ասպեկտներ:
Թարգմանությունը՝ Euromedia24.com-ի
