Ուկրաինայի Գերագույն Ռադան հաջորդ շաբաթ կքվեարկի ռազմական դրությունը և զորահավաքը, որոնք ավարտվում են մայիսի 9-ին, ևս 90 օրով երկարացնելու օգտին։ Այս մասին հայտնել է Ուկրաինայի խորհրդարանի պատգամավոր Յարոսլավ Ժելեզնյակը։
«Ռազմական դրությունը և զորահավաքը կերկարացվեն շուտով: Դա տեղի կունենա ապրիլի 15-18-ը` 90 օրով»,- ասել է պատգամավորը YouTube-ի իր ալիքում հրապարակված տեսանյութում։
Նա բացատրել է, որ այս հարցի շուրջ քվեարկությունը, սովորաբար, տեղի է ունենում խորհրդարանում ռազմական դրության և զորահավաքի ավարտից երկու շաբաթ առաջ։ Ժելեզնյակը կարծում է, որ Վլադիմիր Զելենսկին համապատասխան օրինագծերը Ռադային կներկայացնի ապրիլի 14-ին կամ 15-ին, որից հետո փաստաթղթերը կուսումնասիրվեն համապատասխան հանձնաժողովում, իսկ հետո դրանք կդրվեն ընդհանուր քվեարկության։
Պատգամավորը նշել է, որ այս երկարաձգումը անհնար է դարձնում օգոստոսին խորհրդարանական կամ նախագահական ընտրությունների անցկացումը։
