ԱՄՆ Կալիֆորնիայում Ռիվերսայդ շրջանի շերիֆի տեղակալները զինված տղամարդու են ձերբակալել նախագահի հանրապետական թեկնածու Դոնալդ Թրամփի քարոզարշավի ժամանակ։Վարչաշրջանի շերիֆը միջադեպն անվանել է «ենթադրաբար ձախողված մահափորձ», հաղորդում է Southern California News Group-ը:Կալիֆորնիայի հարևան Նևադա նահանգի 49-ամյա Ուեմ Միլլերի մեքենան կանգնեցվել է հանրահավաքի ժամանակ՝ անցակետում։ Միլլերի մոտ հայտնաբերել են որսորդական հրացան և ատրճանակ, հայտնում է Los Angeles Times-ը։
Զենքը լիցքավորված է եղել, կասկածյալից առգրավվել է զինամթերքով լիցքավորված մեծ տարողունակ պահունակ։Ձերբակալվելիս՝ Միլլերը ներկայացրել է Թրամփի հետ հանդիպման կեղծ VIP հրավեր և մամուլի ներկայացուցչի մասին անձը հաստատող փաստաթուղթ։
Նրա խոսքով՝ կասկածյալը գրանցված հանրապետական է, ով մասնակցել է 2022 թվականի Նևադայի օրենսդիր մարմնի ստորին պալատի ընտրություններին։Ենթադրվում է, որ Միլլերը աջակողմյան հակակառավարական խմբավորման անդամ է:Միլլերը ձերբակալվել է լիցքավորված զենք կրելու և մեծ հզորությամբ պահունակ պահելու մեղադրանքով։ Շերիֆի գրասենյակի հայտարարության մեջ ասվում է, որ միջադեպը չի ազդել թեկնածուի կամ նրա հետ հանդիպման մեջ ներգրավված անձանց անվտանգության վրա:
