ԱՄՆ պաշտպանության նախարարությունը խոստովանում է, որ Եմենի Անսար Ալլահ (հութիներ) շարժման դեմ ամերիկյան գործողությունը չի հասնում իր նպատակներին, և ստիպված կլինի ամսական ծախսել մոտ 1 միլիարդ դոլար։ Այս մասին հայտնում է The New York Times-ը (NYT)՝ հղում անելով աղբյուրներին։
Ըստ նրանց՝ Պենտագոնն անարդյունավետ է համարում ստորգետնյա պահեստներին զինամթերքով, հրթիռներով ու անօդաչու սարքերով հարվածները։ Հութիները, ըստ աղբյուրների, ամրացրել են իրենց ստորգետնյա կառույցները և հարձակման տակ գտնվող այլ վայրեր:
Ըստ հրատարակության զրուցակիցների՝ երեք շաբաթվա ընթացքում ԱՄՆ-ը 200 մլն դոլար է ծախսել հութիների դեմ հարվածների համար զինամթերքի վրա՝ չհաշված ծովում և օդում լրացուցիչ ուժեր տեղակայելու, ինչպես նաև Patriot և THAAD հակաօդային պաշտպանության համակարգերի ծախսերը։ Հաշվի առնելով բոլոր ծախսերը՝ Եմենում գործողությունը ԱՄՆ-ին կարժենա ամսական 1 միլիարդ դոլար, իսկ Պենտագոնը շուտով պետք է Կոնգրեսից լրացուցիչ ֆինանսավորում խնդրի։
«Մենք արդեն տեսնում ենք հութիների դեմ զանգվածային հարվածների արդյունքները, մասնավորապես, վերջին շաբաթվա ընթացքում Հութիների կողմից Իսրայելի դեմ բալիստիկ հրթիռների հարձակումների թիվը նկատելիորեն նվազել է։
Նրանք փորձում են ավելի ակտիվ արձագանքել, քանի որ ԱՄՆ օդային հարվածները թուլացնում են նրանց մարտունակությունը և նյութական հնարավորությունները»,- ասել է Պենտագոնի բարձրաստիճան պաշտոնյան NYT-ին տված մեկնաբանությունում:
