Գիտնականները Սուրբ Միքայել հիվանդանոցից (Unity Health Toronto) պարզել են, որ սրտի անսպասելի կանգառները մարզումների ժամանակ ավելի հաճախ հանդիպում են միջին տարիքի տղամարդկանց մոտ: Ուսումնասիրության արդյունքները հրապարակվել են Canadian Journal of Cardiology (CJC) հանդեսում:
Գիտնականները վերլուծել են Կանադայի հինգ նահանգների առողջապահական համակարգերի տվյալները 2016-ից 2020 թվականներին: Նրանք փորձում էին պարզել, թե որ սպորտաձևերի հետ է կապված սրտի կանգն ու սրտի մահվան դեպքերը: Այսպիսի պաթոլոգիաների հիմքում դրված են սրտի էլեկտրական հաղորդունակության խանգարումները, ինչպես նաև ժառանգական և բնածին կառուցվածքային շեղումները, որոնք դրսևորվում են ֆիզիկական ծանրաբեռնվածության ժամանակ:
Պարզվել է, որ սրտի անսպասելի կանգառն առաջացել է ավելի քան 50 սպորտաձևերի ժամանակ: Ամենաբարձր ռիսկը եղել է սիրողական մարզիկների մոտ, որոնք զբաղվել են հոկեյով, վազքով, հեծանվարշավով, թիմային սպորտաձևերով և մարզասրահի վարժություններով:
Գիտնականները նաև պարզել են, որ տղամարդկանց մոտ սրտի կանգառի հավանականությունը մարզվելու ընթացքում 16 անգամ ավելի բարձր է, քան կանանց մոտ: Այդ թվում, սիրողական մարզիկների միջին տարիքի ներկայացուցիչները ամենաշատն են տառապում՝ 94%-ը բոլոր մահացածների ու հոսպիտալացվածների կազմել են միջին տարիքի՝ 58 տարեկան տղամարդիկ:
Ուսումնասիրության արդյունքների համաձայն՝ մարզման ընթացքում սրտի կանգի ժամանակ գոյատևման տոկոսը կազմում է մոտ 52%, ինչը շատ ավելի բարձր է, քան երբ սրտի կանգը տեղի է ունենում ավելի քիչ մարդաշատ վայրերում: Գիտնականները ենթադրում են, որ մարզասրահում կամ հոկեյի դաշտում հիվանդի վիճակի փոփոխությունը հաճախ նկատում են ներկա գտնվող մարդիկ, որոնք կարող են իրականացնել սրտի և թոքերի վերակենդանացում:
Թարգմանությունը՝ Euromedia24.com-ի
