Երեկ ԱՄՆ-ն սկսեց լայնածավալ օդային պատերազմ Եմենի դեմ, որն իրականում միտված է տարածվելու Իրանի վրա։ Դատելով ԱՄՆ նախագահ Դոնալդ Թրամփի և նրա մերձավոր թիմակիցների հայտարարություններից, նրանք պատրվակ են փնտրում Իրանին հարվածելու համար։Զուգահեռաբար ու համաձայնեցված կերպով այս գիշեր Իսրայելը վերսկսեց Գազայի ցեղասպանությունը՝ կես օրվա ընթացքում սպանելով ավելի քան 400 պաղեստինցի։
ԱՄՆ-ի պատերազմը Եմենի հութիների դեմ և Գազայում պաղեստինցիների ցեղասպանությունը մի քանի օրում չեն դադարելու։ Ամեն ինչ կարող է մեկ ակնթարթում այնպես սրվել ու պայթել, որ Ուկրաինայում պատերազմը խաղուպար կթվա։ Եկեք մի պահ պատկերացնենք, թե ինչպիսի ծավալներ կարող է ընդունել Մերձավոր Արևելքում այդ մեծ պատերազմը։Պատերազմի մեջ կարող են ներգրավվել Իսրայելը, ԱՄՆ-ն ու նրա դաշնակիցները, Իրանը, Եգիպտոսը, Հորդանանը, Իրաքը, Սաուդյան Արաբիան, Արաբական Էմիրությունները, Սիրիան, Լիբանանը, մի շարք այլ արաբական պետություններ, Թուրքիան։
Պատերազմը կարող է ընդունել «բոլորը բոլորի դեմ» սկզբունքը՝ Եմենը՝ Իսրայելի, Սաուդյան Արաբիայի և Արաբական Էմիրությունների դեմ, Սիրիան՝ Լիբանանի դեմ, քրդերը՝ Թուրքիայի դեմ, Եգիպտոսը՝ Իսրայելի դեմ, Ադրբեջանը՝ Իրանի և Հայաստանի դեմ և այլն։
Ինչպիսի՞ պատասխան կարող է տալ Իրանը՝ լայնածավալ հարձակման ենթարկվելու դեպքում։Նախ, հրթիռային հարվածներ կհասցվեն Իսրայելին, ինչպես նաև Մերձավոր Արևելքում գտնվող ամերիկյան ռազմական բազաներին և հրամանատարական կետերին, որոնք տեղակայված են Սաուդյան Արաբիայում, Բահրեյնում, Քաթարում, Իրաքում, Թուրքիայում, Կիպրոսում։
Հրթիռային հարվածներ կհասցվեն նաև ԱՄՆ ռազմածովային ուժերին և ավիակիրներին։ Ադրբեջանից Իրանի դեմ որևէ թշնամական գործողություն կարող է պատճառ դառնալ, որ Իրանը հարվածի նաև Ադրբեջանին՝ ընդհուպ ներխուժի Ադրբեջան, ինչն իր հերթին ավտոմատ կերպով պատերազմի մեջ կմտցնի Թուրքիային։Ադրբեջանն ակտիվորեն նախապատրաստվում է ներխուժել Հայաստան՝ մոտավորապես այն պահին, երբ Իսրայելն ու ԱՄՆ-ն կհարվածեն Իրանին։
Հայաստանի դեմ հարձակման նպատակը ոչ միայն Թուրքիայի հետ միացումն է, Հայաստանի ոչնչացումն ու Մեծ Թուրանի կառուցումը, այլև Իրանին Հայաստանի վրայով իր հյուսիսային վերջին ճանապարհից զրկելը։ Եթե Իլհամ Ալիևը համոզվի, որ Իրանը շատ է թուլացել ստացած հարվածներից, նա չի վարանի զորք մտցնել նաև հյուսիսային Իրան՝ այսպես կոչված Հարավային Ադրբեջանում թյուրքախոս իրանցիների ապստամբություն գրգռելու նպատակով։ Այնպես որ՝ Ադրբեջանի ֆաշիստներն իրենք էլ հաճույքով կհարձակվեն Հայաստանի վրա, բայց այդ քայլն իրենց նաև հանձնարարված է իր իսրայելյան, թուրքական և արևմտյան ավագ դաշնակիցների կողմից։Ո՞ւմից Հայաստանը կարող է օգնություն ստանալ՝ հարձակման ենթարկվելու դեպքում։ Դատելով բոլոր առկա տեղեկություններից՝ ո՛չ ՌԴ-ն ու ՀԱՊԿ-ը, ո՛չ էլ ԱՄՆ-ն և ՆԱՏՕ-ն գործնական, ռազմական օժանդակություն Հայաստանին չեն ցուցաբերի։ Իսկ դատարկ խոսքերով աջակցությունն արժեք չի ունենալու։ Մենք լինելու ենք կա՛մ լիովին միայնակ, կամ, հնարավոր է, Իրանն այս անգամ կփորձի իր ամբողջ ռազմական ուժով թույլ չտալ ադրբեջանա-թուրքական ագրեսիայի հաջողությունը՝ կանխելով նաև իր տարածքային ամբողջականության և ինքնիշխանության դեմ անխուսափելի զուգահեռ կամ հետագա ոտնձգությունները։
ՀԱՅԱՍՏԱՆԻ ԳՈՅՈՒԹՅՈՒՆՆ ԻՐԱՆԻ ՀԱՄԱՐ ՈՒՆԻ ԿԵՆՍԱԿԱՆ ՌԱԶՄԱՎԱՐԱԿԱՆ ՆՇԱՆԱԿՈՒԹՅՈՒՆ։Կարճ ասած՝ տարածաշրջանում իրավիճակը կարող է զարգանալ ամենավատ ու անկանխատեսելի սցենարներով։Ամենակարևոր հարցը. պատրա՞ստ է Հայաստանը պաշտպանական պատերազմ մղել, կատաղի պաշտպանական պատերազմ։ Այս հարցին պատասխանելուց առաջ, պետք է հիշենք, որ պատերազմին պատրաստ լինելը չի նշանակում ունենալ միայն զենք, որը, շատ կամ քիչ չափով Հայկական բանակն ունի։ Բանակից, նրա հրամանատարությունից և ամբողջ ժողովրդից պահանջվում են նաև մարտական ոգի, միասնություն և կամք։ Ո՞վ և ե՞րբ պետք է ներարկի և ամրապնդի այդ անհրաժեշտ հասարակական հատկանիշները, որոնք ինքնստինքյան չեն առաջանում։
Ի՞նչ են անում այս ուղղությամբ Փաշինյանն ու իշխող կուսակցությունը՝ ՔՊ-ն։
Ճիշտ է՝ քնեցնում են հայ ժողովրդին՝ «Խաղաղության պայմանագրի» մասին հեքիաթներ պատմելով։
Իսկ ի՞նչ է անում խորհրդարանական «ընդդիմությունը». գործնականում՝ ոչինչ, զբաղվում է ժամավաճառությամբ։Կարճ ասած՝ տխուր և անպատրաստ վիճակ է։Սակայն մեր հայրենիքը, մեր ազգային արժանապատվությունը ամեն դեպքում պետք է պաշտպանենք։
Հայաստանին այսօր, ավելի քան երբևէ, պետք է ՀԱՅԿԱԿԱՆ ռազմաքաղաքական ղեկավարություն։Խոսքս ուղղում եմ հայ զինվորականությանը՝ ՀԱՅՐԵՆԻՔԸ, ՕՋԱԽՆ ՈՒ ԸՆՏԱՆԻՔԸ ՊԱՇՏՊԱՆԵԼ Է ՊԵՏՔ՝ ՉՆԱՅԵԼՈՎ ՈՒԺԵՐԻ ՀԱՐԱԲԵՐԱԿՑՈՒԹՅԱՆԸ։
ԱՌԱՋՆ ԱՍՏՎԱԾ։
