Ամիրյան-Զաքյան փողոցների խաչմերուկում քանդվել է ասֆալտը, իրականացվել են աշխատանքներ, որից հետո անորակ ասֆալտապատում է արվել։ Այս մասին այսօր Երևանի քաղաքապետարանի նիստի ժամանակ հայտարարեց Երևանի փոխքաղաքապետ Լևոն Հովհաննիսյանը՝ զեկուցելով, որ հայտնաբերել են նորմերին չհամապատասխանող ասֆալտապատման աշխատանքներ։
«Անցյալ տարի Ամիրյան-Զաքյան փողոցում ասֆալտապատման աշխատանքներ են իրականացվել, սակայն անցած ամիս հայտնաբերել ենք, որ չարտոնված ասֆալտբետոնեծածկի քանդման աշխատանքներ են իրականացվել, որոնք հավանաբար արվել են գիշերային ժամերին, քանի որ տեսանելի չեն եղել, բացի դա երևում է, թե ինչ անորակ աշխատանք է արվել և եթե հավելյալ լուծումներ չանենք, ասֆալտի վրա կունենանք ճաքեր։ Կանաչապատման մեր գործընկերներին խնդրեցի, որ իրականացնեն քանդման աշխատանքներ և այստեղ հայտնաբերեցինք հոսանքի լարեր։ Դժվար է պնդել, թե որ կազմակերպությունն է կամ մասնավոր ընկերությունն է իրականացրել, բայց խնդրում եմ պարոն քաղաքապետ, որ նման դեպքեր նկատելուց հետո մենք դիմենք իրավապահ մարմիններին, որպեսզի պարզենք՝ ովքեր են համայնքային ունեցվածքն այս տեսքով փչացնում»,- ասաց փոխքաղաքապետը։
Ավինյանն էլ նշեց, եթե իրենք տնտեսվարողներին նախապես տեղեկացրել են նման աշխատանքներ իրականացնելուց առաջ, ապա ինքը համամիտ է փոխքաղաքապետի ասածների հետ․ «Այո՛, մենք համապատասխան միջոցներ պետք է ձեռնարկենք, մանավանդ, որ այդպես գողեգող գիշերով աշխատանքներ են արել»,- նշեց Ավինյանը։
Հովհաննսիայնը թվարկեց, որ նման դեպքեր արձանագրվել են նաև Կոմիտասի պողոտայում, և գազի խողովակի միացման աշխատանքներից հետո անորակ ասֆալտապատում է արվել։ Նույնը նաև Պարոնյան փողոցում, որտեղ ՀԷՑ-ն աշխատանքներ է իրականացրել, սակայն քաղաքապետարանի դիտողություններից հետո ասֆալտապատել է չափանիշներին համապատասխան։
Փոխքաղաքապետն ընդգծեց, որ Երևանի քաղաքապետարանն այսուհետ թվային հարթակներում կներկայացնի, թե որ փողոցներում է նախատեսում ասֆալտապատման աշխատանքներ իրականացնելու և ինչ ժամկետներում։
Սոնա Հարությունյան
