MediaHub-ը գրում է․
Մենք երեկ գրել էինք, որ Պետեկամուտների նորանշանակ նախագահ Էդուարդ Հակոբյանը կադրային ջարդ է սկսել և պրոֆեսիոնալ, փորձառու կադրերին հանում, իր ծանոթ-բարեկամներին, ընկերներին, հարևանին, բաջանաղին ու ազապ-բաշիին է նշանակում, որոնք առանձնապես որևէ առնչություն չունեն հարկային կամ մաքսային ոլորտի հետ։
Ամենախնդրահարույց նշանակումներից մեկը, որը հարուցել է ՊԵԿ աշխատակիցների տարակուսանքն ու դժգոհությունը, ՊԵԿ Ներքին անվտանգության վարչության դեռևս չնշանակված պետի նշանակումն է, ինչի մասին MediaHub-ը երեկ հիշատակել էր։ Հիշեցնենք, ՆԱՎ-ի պետը Գոռ Բակլաչյանն էր, որը Ռուստամ Բադասյանի մտերիմներից է, և Բադասյանի ազատվելուց հետո առաջինն ինքը դիմում գրեց ու հեռացավ։ Տևական ժամանակ է՝ այս պաշտոնը թափուր էր, հիմա էլ է դե յուրե թափուր մնում, բայց դե ֆակտո կա մարդ, ով ստվերային կերպով ՆԱՎ-ի պետ է աշխատում ՊԵԿ-ում։ Խոսքը Էդուարդ Հակոբյանի ընկերոջ՝ Գառնիկ Մարգարյանի մասին է, ով հաստիքով այս պահին խորհրդականն է, բայց փաստացի ՆԱՎ-ի պետ է աշխատում։
Պաշտոնապես, սակայն, ինչպես հայտնեցին մեզ ՊԵԿ-ից, Ներքին անվտանգության վարչության պետի գործառույթներն իրականացնում է Ղազար Ղազարյանը՝ Փաշինյանի երբեմնի թիկնապահներից մեկն ու նրա ուսապարկը բռնողը։ Ղազարին շատերը հենց դրանով են հիշում, որ նա դեռ 2018 թվականի հեղափոխություն կոչվող իրադարձությունների ժամանակ մշտապես Փաշինյանի հետ էր և նրա ուսապարկն էր պահում։ Բայց իշխանության գալուց երկու տարի անց՝ 2020 թվականի օգոստոսին, Ղազար Ղազարյանն ազատվեց Փաշինյանի կողքով քայլելու և նրա ուսապարկը բռնելու «պատվավոր» աշխատանքից։ Թե որն էր Ղազարյանի իրական գործառույթը Փաշինյանի թիմում՝ բացի նրա ուսապարկը բռնելուց, այդպես էլ ոչ ոք չիմացավ, բայց կարճ ժամանակ անց Ղազարին Փաշինյանը տեղավորեց ՊԵԿ-ում աշխատանքի՝ նշանակելով տարբեր պաշտոնների, հիմա էլ ՊԵԿ Ներքին անվտանգության վարչության պետի տեղակալն է։ Ու, գուցե զարմանալի թվա, որ Փաշինյանի կողքով քայլած մարդը կարող է իրեն լավ դրսևորել պետական ապարատում, բայց Ղազարյան մասին համակարգում հիմնականում դրական կարծիքներ ենք լսել, որ սկզբունքային ու ճիշտ տղա է, և եթե մի բան որոշեց, որ սխալ է՝ այդտեղ կոռուպցիոն ռիսկ կամ որևէ անօրինական մի բան կա, ապա իր մտերիմ մարդն էլ զանգի՝ չի անի կամ դրա դեմը կառնի։
Մոտավորապես այսպես բնութագրեցին նրան ՊԵԿ-ում նրան ճանաչող մարդիկ։ Հավանաբար դրա համար էլ Փաշինյանի հետ չի կարողացել աշխատել։
Բայց Գառնիկ Մարգարյանի գալուց հետո Ղազարը միայն թղթի վրա է ՆԱՎ-ի պետի ժամանակավոր պաշտոնակատար։ Վարչության աշխատակիցներին իրականում ցուցումներ է տալիս հենց Գառնիկը, որը դատախազությունից է տեղափոխվել Պետեկամուտների կոմիտե։ Նա մինչ այդ Երևան քաղաքի Կենտրոն և Նորք-Մարաշ վարչական շրջանների դատախազության ավագ դատախազն էր, և այս տարվա հունվարի 14-ին է ազատվել զբաղեցրած պաշտոնից, որ գա ՊԵԿ՝ իր ընկերոջ ղեկավարած հիմնարկում խորհրդական, ապագայում նաև՝ ՆԱՎ-ի պետ։
Համենայնդպես, այդպես են խոսում շենքում, որ շուտով հենց նա է նշանակվելու այս կարևոր վարչության պետ, որտեղ, սովորաբար, ցանկացած ղեկավար իր մտերիմ մարդուն է նշանակում, որ վստահելի լինի և իր աչք ու ականջը լինի։ Բայց ՆԱՎ-ի պետ դառնալու համար Գառնիկ Մարգարյանը դեռ պետք է բարեվարքության ստուգում և ատեստավորում անցնի, ինչը ժամանակ է պահանջում, դասընթացների պետք է մասնակցի, որոշ ընթացակարգերով անցնի և այլն։ Եվ հիմա հենց դրանով են զբաղված, որ Գառնիկին նախապատրաստեն ՆԱՎ-ի պետի պաշտոնին։ Թե որքանով է Գառնիկ Մարգարյանը կարողանալու գլուխ հանել հարկային ու մաքսային ոլորտից՝ ժամանակը ցույց կտա, բայց այն, որ եկած-չեկած՝ արդեն անհասկանալի ցուցումներ է տալիս և ինչ-որ չհիմնավորված խստացումներ մտցնում, խառնվում այլոց գործառույթների մեջ, այդ մասին արդեն ահազանգում են ոչ միայն ՊԵԿ-ից, այլև անգամ շարքային քաղաքացիները։
Մասնավորապես, օրեր առաջ ՆԱՎ-ի «ստվերային» պետի հանձնարարությամբ «Զվարթնոց» օդանավակայանի ստուգումների զոնայում ուժեղացված հսկողություն էին իրականացնում ՆԱՎ-ի և Մաքսանենգության դեմ պայքարի վարչության աշխատակիցները, որոնք քաղաքացիական հագուստներով կանգնում էին կանաչ և կարմիր ուղիների մոտ ու հիմնականում Եվրոպայից և Արաբական Միացյալ Էմիրություններից ժամանողներին համատարած կանչում էին ստուգման։
Այսինքն՝ առանց հասկանալու, առանց որևէ իրավական հիմք ցույց տալու բոլորին պոտենցիալ մաքսանենգ առևտրականների տեղ են դնում ու ոտքից գլուխ ստուգում են, քրքրում բոլոր իրերը, որ մի բան գտնեն տուգանեն կամ ուղարկեն հայտարարագրման։ Մեզ պատմեցին, որ իրենց այս անհասկանալի խստացման պատճառով մի քանի օր շարունակ «Զվարթնոցի» այդ հատվածում հսկայական հերթեր էին գոյացել, ինչն առաջացրել էր քաղաքացիների զայրույթն ու դժգոհությունը, որ բոլորին պոտենցիալ հանցագործի տեղ դրած՝ կանգնեցնում, ժամերով ստուգում էին։
Այս ամենից զատ՝ մեզ ասացին, որ Գառնիկ Մարգարյանը նաև խառնվում է կադրային հարցերին և ինքն է որոշում՝ ում ազատի, ում ընդունի աշխատանքի, Էդուարդ Հակոբյանն էլ նրան «պռախոդ» է տվել։ Դրա արդյունքում հարկային ու մաքսային բլոկի մի շարք աշխատակիցների՝ բաժնի պետեր, պետի տեղակալներ, ավելի ներքևի օղակների աշխատակիցներ, այս օրերին անհասկանալի պատճառաբանությամբ ազատվում են զբաղեցրած պաշտոններից, այն դեպքում, երբ նրանց մեջ կան անձինք, որոնք պրոֆեսիոնալ են և իրենց ծառայության ընթացքում հասցրել են լավ արդյունքներ ցույց տալ։
Վահե Մակարյան
