Իսրայելը մտադիր է հաղթահարել ԱՄՆ-ից և արևմտյան այլ երկրներից իր ռազմական կախվածությունը։ Euromedia24-ի փոխանցմամբ՝ այս մասին հայտնում է The Washington Post-ը։
«Իսրայելը միլիոնավոր դոլարներ է ներդնում երկրի ներսում ավելի ծանր սպառազինություն ստեղծելու համար՝ ԱՄՆ-ից և արևմտյան այլ երկրներից զենքի ներկրման վրա իր կախվածության հետ կապված աճող մտավախությունների ֆոնին, թեև նրանցից զենքի հոսքը հիմնականում շարունակվում է անխափան», - ասվում է հոդվածում:
Իսրայելի պաշտպանության նախարարությունն անցյալ շաբաթ հայտնել է, որ ստորագրել է շուրջ 275 միլիոն դոլարի պայմանագրեր՝ ծանր ռումբերի և պաշտպանական հումքի արտադրության համար։ «Սա պատերազմի հիմնական դասն է, որը թույլ կտա Իսրայելի պաշտպանության բանակին շարունակել արդյունավետ գործել պատերազմական բոլոր թատերաբեմերում»,- ասել է ՊՆ գլխավոր տնօրեն Էյալ Զամիրը։
Հունվարի 4-ին ԱՄՆ Պետդեպարտամենտը Կոնգրեսին ոչ պաշտոնապես տեղեկացրել է Իսրայելին 8 միլիարդ դոլար արժողությամբ զենքի մեծ խմբաքանակի հնարավոր վաճառքի մասին՝ ներառյալ կործանիչների և ուղղաթիռների զինամթերքը։
