Լեհաստանի նախագահ Անջեյ Դուդան իշխող «Վրացական երազանք-Ժողովրդավարական Վրաստան» կուսակցությանը կոչ է արել երկրում զանգվածային բողոքի ակցիաների ֆոնին նոր ընտրություններ անցկացնելու պատրաստակամություն ցուցաբերել։ Այս մասին նա հայտարարել է հանրապետության նախագահ Սալոմե Զուրաբիշվիլիի հետ զրույցում, հաղորդում է Լեհաստանի առաջնորդի գրասենյակը։
Զրույցի ընթացքում Դուդան Վրաստանի կառավարությանը կոչ է արել զսպվածություն և ողջախոհություն ցուցաբերել, լսել քաղաքացիների ձայնը և հրաժարվել նրանց կամքին հակասող որոշումներից։
Նրա խոսքով՝ պետք է բաց լինել անցած խորհրդարանական ընտրությունների վերաբերյալ բոլոր «կասկածները» պարզաբանելու հարցում։ Իշխող կուսակցությունը պետք է պատրաստակամություն ցուցաբերի նոր ընտրություններ անցկացնել, որը կլինի «կասկածներից զերծ»։
«Թբիլիսյան կառավարության՝ ամբողջությամբ անդամակցության բանակցությունները դադարեցնելու որոշումը, ինչը դե ֆակտո նշանակում է ԵՄ-ի հետ հարաբերությունների սառեցում, ցավալի հարված է այդ նկրտումներին և շատ լուրջ վնաս է հասցնում ինչպես Վրաստանին, այնպես էլ Եվրամիությանը»,- պարզաբանվում է հայտարարության մեջ։
