Ես կարծում եմ, որ փորձառու, ճանապարհ անցած մարդը պետք է լինի ՆԳ նախարար։ Այդ աղջկան չեմ ճանաչում, գուցե լավ իրավաբան է, բայց վարչարարության մեջ չեմ կարող ասել՝ իրեն ինչպես կդրսևորի։ Euromedia24.com-ի հետ զրույցում անդրադառնալով՝ ՀՀ ներքին գործերի նախարարի պաշտոնում նշանակված Արփինե Սարգսյանին, այսպիսի տեսակետ հայտնեց ՀՀ նախկին ոստիկանապետ Ալիկ Սարգսյանը։
Նրա կարծիքով՝ Ոստիկանապետ Արամ Հովհաննիսյանին կարող էին նշանակել նախարարի պաշտոնում, բայց թե ինչու Փաշինյանը չնշանակեց՝ դժվարացավ ասել․ «Արամին շատ լավ գիտեմ, կարող էին նրան նշանակել, բայց ինձ համար անհասկանալի ու անտրամաբանական են բոլոր պատճառաբանությունները։
Այսքան տարի աշխատած տղա է, բայց դե նպատակահարմար են գտել այդ աղջկան նշանակել, ուրեմն ինչ-որ հաշվարկներ կան, որոնց մասին միայն իրենք գիտեն»,- նշեց Սարգսյանը։ Ինչ վերաբերում է հարցին, թե արդյոք կինը կկարողանա ղեկավարել ՆԳՆ-ի նման հզոր կառույցը, որտեղ հիմնականում արական սեռի ներկայացուցիչներ են՝ Սարգսյանը պատասխանեց․ «Աշխարհի շատ երկրներում այդ փորձը կա, որ ՆԳ նախարարները կանայք են։
Դե կին ա էլի, նա հո դուրս չի գալու կոնկրետ գործողություններ կատարի, կաբինետում նստած կանոնակարգելու է աշխատանքը»,- նկատեց նախկին Ոստիկանապետը։ Խոսելով, օրեր առաջ ՆԳ նախարարի պաշտոնից ազատված Վահե Ղազարյանի հայտարարության մասին, ըստ որի՝ իրավապահ համակարգում 47 աշխատակից թմանյութ օգտագործելու համար հեռացվել է աշխատանքից՝ նախկին ոստիկանապետը համեմատականներ անցկացրեց․
«Մենք ստուգումներ էինք անցկացնում, իմ ժամանակ ես խիստ ուշադիր եմ եղել, որովհետև նեգատիվ պրոցես է, որը պետք է կանխվի։ Ոստիկանը չի կարող նարկոման լինել կամ զբաղվել թմրանյութերով՝ օգտագործելը նկատի ունեմ, որովհետև տարածելը քրեորեն պատժելի հանցագործություն է։
Նա, ով օգտագործում է պետք է ազատվի համակարգից, իրավունք չունի համակարգում լինելու։ Ես գիտեմ, որ բոլոր ժամանակներում, բոլոր տեղերում էլ եղել են նման դեպքեր, բայց հիմա ավելի է շատացել։ Իմ ժամանակ եղավ ոստիկանը նույնիսկ վաճառքով էր զբաղվել, ինչի համար դատվեց՝ պատասխանատվության ենթարկվեց և կալանավորվեց»,- եզրափակեց նախկին ոստիակնապետը։
Նշենք, որ կառավարության վերջին նիստին Փաշինյանը հայտարարեց՝ իր համբերության բաժակը լցվել է և իրավապահ համակարգից կոնկրետ արդյունքներ է պահանջում․
«Ոնց որ քյասիբի ռադիո լինեմ»,- ասաց նա։ Վարչապետի այդ դժգոհությանը հետևեցին պաշտոնյաների հրաժարականներ, այդ թվում՝ իր համադասարանցի Վահե Ղազարյանի հրաժարականը, որի փոխարեն ՆԳ նախարարի պաշտոնում նշանակվեց Արփինե Սարգսյանը։
Սոնա Հարությունյան
