Ամեիկացի գործարար Իլոն Մասկը և Վիվեկ Ռամասվամին (Vivek Ramaswamy), ով կգլխավորի Կառավարության արդյունավետության վարչությունը (DOGE) նախագահ Դոնալդ Թրամփի առաջիկա վարչակազմում, նախատեսում են արգելել դաշնային պաշտոնյաներին հեռավար աշխատել: Այս մասին գործարարները գրել են The Wall Street Journal-ի սյունակում։
Այս միջոցը կոչված է հասնելու պաշտոնյաների՝ կամավոր աշխատանքից ազատմանը և, հետևաբար, նրանց աշխատակազմի և ծախսերի կրճատմանը:
«Դաշնային պաշտոնյաներից շաբաթական հինգ օր գրասենյակ գալու պահանջը կհանգեցնի կամավոր աշխատանքից ազատումների ալիքի, որը մենք կողջունենք։Եթե դաշնային պաշտոնյաները չեն ցանկանում ներկայանալ աշխատանքի, ապա ամերիկացի հարկատուները չպետք է վճարեն Covid-ի ժամանակաշրջանի տանը մնալու իրենց արտոնության համար»,- գրել են գործարարները։
Բացի այդ, նրանք ցանկանում են շրջանցել Կոնգրեսը, որպեսզի կրճատեն դաշնային կանոնակարգերը: Նրանց տրամաբանությամբ՝ որքան քիչ լինեն նման փաստաթղթերը, այնքան քիչ աշխատակիցներ կպահանջվեն դրանք կյանքի կոչելու համար։ Միևնույն ժամանակ, գործարարները խոստանում են, որ կրճատված անձնակազմին հարգանքով կվերաբերվեն՝ օգնելով նրանց նոր աշխատատեղեր գտնել մասնավոր հատվածում։ Նախատեսվում է նաև ներդնել վաղաժամկետ կենսաթոշակի խրախուսման համակարգ։
