Ֆրանսիական «Ազգային միավորում» կուսակցության խորհրդարանական խմբակցության ղեկավար Մարին Լը Պենին (Marine Le Pen) աջակցող հանրագիրը, ով հետաքննվում է Եվրախորհրդարանի միջոցների գողության համար, արդեն ստացել է 250 հազար ստորագրություն։
«Ինձ աջակցելու համար նախաձեռնված ստորագրահավաքը, որը մի քանի օրում ստացել է 250 հազար ստորագրություն, հատուկ խաղաղ ակցիա է, որը թույլ է տալիս բոլորին արտահայտել իրենց վրդովմունքը»,- գրել է Լը Պենը X սոցիալական ցանցում։
Միջնորդությունը տեղադրված է կուսակցության կայքում։ Այն կարելի է ստորագրել առցանց: Դրանում, մասնավորապես, ասվում է, որ դատական գործընթացն ուղղված է «Մարին Լը Պենին վարկաբեկելուն և «Ազգային միավորումը» թուլացնելուն։
«Սա փորձ է խեղդել ընդդիմության իրական ձայնը»,- ասվում է հանրագրում։
Նոյեմբերի սկզբին Ֆրանսիայի դատախազները պահանջել էին Լը Պենին դատապարտել հինգ տարվա ազատազրկման՝ Եվրախորհրդարանի միջոցների յուրացման գործով։ Միևնույն ժամանակ, մեղադրող կողմը խնդրում է, որ նա այս ժամկետից երեք տարին կրի փորձաշրջանով, մնացած երկուսը՝ ազատազրկման պատիժը փոխարինելու թույլտվությամբ՝ կրելով էլեկտրոնային ապարանջան կամ ազատությունը սահմանափակելու այլ՝ ոչ խիստ տարբերակներ։
Բացի այդ, դատախազությունը քաղաքական գործչից պահանջում է 300 հազար եվրո տուգանք վճարել։ Ի վերջո, դատախազները կարծում են, որ Լը Պենին պետք է հինգ տարով արգելել մասնակցել ընտրություններին։ Եթե դատարանի կողմից այս պահանջը բավարարվի, նա, մասնավորապես, չի կարողանա առաջադրվել որպես թեկնածու 2027 թվականի նախագահական ընտրություններում։
Ինքը՝ Լը Պենը, ավելի վաղ հայտարարել էր, որ չի խախտել ո՛չ Ֆրանսիայի օրենքները, ո՛չ Եվրախորհրդարանի կանոնները։ Նրա խոսքով, դատախազությունը ձգտում է ոչնչացնել իր քաղաքական կարիերան։
