Ստորին Բավարիայում, Դանուբի ափին, մի կին հայտնաբերել է անսովոր գտածո՝ ավելի քան երկու մետր երկարությամբ անակոնդա, հայտնել է dpa-ն։
Օձը արևի տակ տաքանում էր Շտրաուբինգ Բոգեն շրջանի Կիրհրոտ քաղաքի մոտակայքում, հարավամերիկյան տեսակի բնական արեալից հարյուրավոր կիլոմետրեր հեռու։
66-ամյա կինը օձին նկատել է զբոսանքի ժամանակ և անմիջապես հասկացել, որ դա տեղական տեսակ չէ։ «Օձն ավելի երկար էր, քան նրանք, որոնց մենք այստեղ հանդիպում ենք», — պատմել է նա ոստիկանությանը։
Տարածաշրջանում, մասնավորապես, ապրում են իժեր և էսկուլապյան սահնօձեր։ Այս ոչ թունավոր օձերը նույնպես կարող են հասնել զգալի չափերի․ էսկուլապյան սահնօձը կարող է հասնել մինչև երկու մետրի։
Դեպքի վայր են ժամանել ոստիկաններ, հրշեջներ, ինչպես նաև սողունների մասնագետ։ Նա արագ պարզել է, որ հայտնաբերված օձը անակոնդա է՝ Հարավային Ամերիկայում բնակվող խոշոր օձ։
Կենդանին, ըստ ամենայնի, որոշ ժամանակ պահվել է գերության մեջ։ Բռնելու պահին անակոնդան դիմադրություն ցույց չի տվել։
Բավարիայում անակոնդա պահելը թույլատրվում է միայն խիստ պահանջների պահպանման դեպքում։ Խոշոր վիշապօձերը երկրամասի օրենսդրությամբ դասվում են «վայրի տեսակների վտանգավոր կենդանիների» շարքին։
Անակոնդաները կարող են հասնել մինչև ինը մետր երկարության և կշռել մինչև 200 կիլոգրամ։ Ավելի փոքր առանձնյակները հիմնականում սնվում են թռչուններով, որոնք արուների համար մնում են հիմնական որսը ողջ կյանքի ընթացքում։
Էգերը, աճելուն և սեռական հասունության հասնելուն զուգընթաց, անցնում են ավելի խոշոր որսի՝ ներառյալ կապիբարներ, երիտասարդ եղջերուներ, ինչպես նաև սողուններ, օրինակ՝ կայմաններ։
Անակոնդաները սպանում են որսին՝ սեղմելով այն մարմնի հզոր օղակներով, ապա ամբողջությամբ կուլ են տալիս։
