Ուկրաինայի նախագահ Վլադիմիր Զելենսկին շնորհակալություն է հայտնել Կանադային նոր պաշտպանական փաթեթի համար՝ նշելով, որ այն առաջին հերթին կուժեղացնի երկրի հակաօդային պաշտպանությունը։
«Սա առաջին հերթին մեր ՀՕՊ-ի ուժեղացումն է՝ և՛ Patriot համակարգերի, և՛ մեր մարտական ինքնաթիռների համար, որոնք խոցում են ռուսական ռեակտիվ «Շահեդները»»,- գրել է Զելենսկին։
Նրա խոսքով՝ Կանադայում ներկայում վերապատրաստվում է 21 ուկրաինացի օդաչու։ Ուկրաինացի զինվորականների պատրաստմանը տարբեր փուլերում մասնակցում են նաև այլ երկրներ։
Զելենսկին հայտնել է նաև Կանադայի հետ «Drone Deal»-ի շուրջ պայմանավորվածության մասին՝ նշելով, որ առաջին փաստաթուղթն արդեն ստորագրվել է։ Նրա խոսքով՝ այն Ուկրաինային լրացուցիչ հնարավորություններ կտա ֆինանսավորելու պաշտպանությունը, իսկ Կանադային՝ ստանալու ժամանակակից պատերազմի պայմաններում փորձարկված տեխնոլոգիական հնարավորություններ։
Կողմերը պայմանավորվածություններ են ձեռք բերել նաև էներգետիկ ոլորտում, որոնք, ըստ Զելենսկու, կարևոր են ինչպես առաջիկա ձմռանը, այնպես էլ երկարաժամկետ հեռանկարում։
Կանադան նաև 40 միլիոն դոլար կհատկացնի ուկրաինացի վետերանների համար ստեղծվելիք հիմնադրամին։
Զելենսկու հետ հանդիպման ժամանակ Կանադայի վարչապետ Մարկ Քարնին իր հերթին հայտարարել է, որ Ուկրաինան երբեք չի հանձնվի։
Նա հիշեցրել է, որ Ռուսաստանի լայնածավալ ներխուժման սկզբում, իր խոսքով, Վլադիմիր Պուտինը կանխատեսում էր արագ հաղթանակ և Կիևի գրավում մի քանի օրվա ընթացքում։
«Նա կարծում էր, որ ուկրաինական պետությունը կփլուզվի, որ հնարավոր կլինի կոտրել ուկրաինացի ժողովրդի կամքը։ Անցել է չորս տարի և 198 օր խիզախ դիմադրության։ Ուկրաինան երբեք չի հանձնվի»,- հայտարարել է Քարնին։
