2026 թվականի հուլիսի 23-ին Բրյանսկի, Սմոլենսկի և Կալուգայի մարզերի Ռոսսելխոզնադզորի վարչության վերահսկողությամբ Սմոլենսկի մարզում ոչնչացվել է հայկական ծագման թարմ կտրած վարդերի խոշոր խմբաքանակ: Այս միջոցառումը կիրառվել է Ռուսաստան կարանտինային արտադրանքի ներմուծման կանոնների կոպիտ խախտումների պատճառով:
«2026 թվականի հունիսի 18-ին գերատեսչության տեսուչները Սմոլենսկի մաքսատան աշխատակիցների հետ համատեղ հայտնաբերել և արգելանքի են վերցրել 39,2 հազար ծաղիկ:
Այս խմբաքանակը տեղափոխող տրանսպորտային միջոցը, որը վարում էր Բելառուսի քաղաքացին, ուղևորվում էր Մինսկի մարզից Մոսկվա: Ընդ որում, ուղեկցող փաստաթղթերում բեռնափոխադրողի կողմից բեռը հայտարարագրված է եղել որպես ոչ ալկոհոլային տոնուսավորող ըմպելիքներ:
Բեռնախցիկի զննման ընթացքում հայտնաբերվել են ծաղիկներ, որոնց համար բացակայում էին բուսասանիտարական և ապրանքաուղեկից փաստաթղթերը: Մակնշման պիտակների պահպանված հատվածներում նշված է եղել դրանց հայկական ծագումը:
2026 թվականի հունիսի 12-ին Ռոսսելխոզնադզորը ժամանակավոր սահմանափակումներ է մտցրել Հայաստանից ծագող և առաքվող կարանտինային արտադրանքի՝ Ռուսաստան ներմուծման, ինչպես նաև նրա տարածքով տարանցման վրա: Սահմանափակումները մտցվել են Եվրասիական տնտեսական միության մասին պայմանագրին համապատասխան՝ երկրի տարածք վտանգավոր կարանտինային օբյեկտների թափանցումը կանխելու նպատակով:
Ռուսական շուկա նշված ապրանքատեսակների մատակարարման արգելքի, ինչպես նաև տեղափոխման անվտանգությունը և օրինականությունը հաստատող փաստաթղթերի բացակայության պատճառով, Ռոսսելխոզնադզորի վարչության որոշմամբ վարդերի այս խմբաքանակը ոչնչացվել է: Փոխադրողը ենթարկվել է վարչական պատասխանատվության ՌԴ ՎԱԽ օրենսգրքի 10.2 հոդվածով»,- ասվում է գերատեսչության տարածած հաղորդագրության մեջ:
