Ուկրաինայի նախագահ Վոլոդիմիր Զելենսկին հայտնել է, որ նախկին պաշտպանության նախարար Միխայիլ Ֆեդորովին առաջարկել է մի քանի պաշտոն, որոնցից վերջինը ռազմական ինովացիաների գծով փոխվարչապետի պաշտոնն է։ Այս մասին նա ասել է Կիևում Իռլանդիայի վարչապետ Միխոլ Մարտինի հետ համատեղ ասուլիսի ընթացքում:
Զելենսկին ընդգծել է, որ անհրաժեշտ է համակարգում Պաշտպանության նախարարության ղեկավարության, բանակի ղեկավարության և, անշուշտ, Ուկրաինայի նախագահի հետ: Նա հավելել է, որ դա պետք է անել ամեն օր, և ինքը դա առաջարկել է Ֆեդորովին:
Հիշեցնենք, որ անցած շաբաթ Ուկրաինայի նախագահ Վոլոդիմիր Զելենսկին որոշել էր Միխայիլ Ֆեդորովին ազատել պաշտպանության նախարարի պաշտոնից և նրա փոխարեն նշանակել ԱԱԾ նախկին ժամանակավոր պաշտոնակատար Եվգենի Խմարային: Ուկրաինացիների մեծամասնությունը չի աջակցում նախագահի այս որոշմանը, և երկրում բողոքի ցույցեր են սկսվել:
Զելենսկին պարզաբանել էր, որ Ֆեդորովի ազատումը կապված էր Պաշտպանության նախարարության և ԶՈւ ղեկավարության միջև արդյունավետ փոխգործակցության բացակայության հետ: Ըստ նրա՝ կողմերը չեն կարողացել աշխատանքը կարգավորել առանց երկրի ղեկավարի մասնակցության, թեև պետք է համագործակցեին ամեն օր:
Միևնույն ժամանակ, ԶՈւ արդեն նախկին գլխավոր հրամանատար Ալեքսանդր Սիրսկին հայտարարել էր, որ իր և Ֆեդորովի միջև որևէ հակամարտություն չկա: Նրա խոսքով՝ Գլխավոր շտաբի և Պաշտպանության նախարարության միջև ծագում են միայն աշխատանքային տարաձայնություններ, որոնք կողմերը լուծում են սովորական ընթացակարգով:
Ավելի վաղ Ֆեդորովը պատմել էր, որ Զելենսկուն առաջարկել էր փոխել ռազմական ղեկավարությանը, սակայն նախագահը չէր աջակցել այդ գաղափարին: Դրանից հետո, նախկին նախարարի խոսքով, Գլխավոր շտաբը սկսել էր արգելափակել իր առաջարկած բարեփոխումները:
Հայտնի է, որ Զելենսկին Ֆեդորովին նոր պաշտոն է առաջարկել, սակայն RBC-Ukraine-ի աղբյուրների փոխանցմամբ՝ Ֆեդորովը պատրաստ է վերադառնալ միայն պաշտպանության նախարարի պաշտոնին:
