Ինքնաթիռ նստել, քնել, նախաճաշել, աշխատել և նորից քնել՝ և այս ամենն առանց վայրէջքի։ Հուլիսի 24-ին Airbus ընկերությունը կիրականացնի տարվա ամենատպավորիչ փորձնական թռիչքը, հայտնում է Bild-ը։
Airbus A350-1000ULR նոր օդանավը պետք է անվայրէջք թռիչք կատարի Տուլուզից Մելբուրն. Airbus-ի ներկայացուցիչները Executive Traveller պորտալին հաստատել են այս տեղեկությունը։ Գրեթե 17 հազար կիլոմետր երկարությամբ և շուրջ 22 ժամ տևողությամբ երթուղին լուրջ փորձություն կդառնա ավստրալական Qantas ավիաընկերության «Արշալույս» (Sunrise) բազմամիլիարդանոց նախագծի համար։
Այս թռիչքը կտա այն հարցի պատասխանը, թե արդյոք առևտրային օդանավն ընդունակ է գրեթե մեկ օր մնալ օդում՝ առանց միջանկյալ վայրէջքների։ Qantas-ը ձգտում է իրականացնել այս երազանքը 2017 թվականից՝ կազմակերպել ուղիղ չվերթներ Ավստրալիայից Եվրոպա և Հյուսիսային Ամերիկա՝ առանց վերալիցքավորման, վայրէջքների կամ ճանապարհին կանգառների։ Եթե ամեն ինչ ընթանա ըստ պլանի, ապա 2027 թվականի հոկտեմբերից սկսած ուղևորները կկարողանան առաջին անգամ առանց վայրէջքների թռչել Սիդնեյից Լոնդոն կամ Նյու Յորք։
Այս չվերթներն իրականացնելու համար պատվիրված A350-1000ULR ինքնաթիռները մի շարք առանցքային փոփոխությունների կարիք ունեն. օդանավի պոչամասում կտեղադրվի 20 հազար լիտր տարողությամբ լրացուցիչ վառելիքի բաք, ինչպես նաև կարդիականացվեն վառելիքի և խոհանոցի սառեցման համակարգերը։ A350-ի նոր մոդիֆիկացիան պետք է անցնի Թռիչքային անվտանգության եվրոպական գործակալության հավաստագրումը, նախքան կկարողանա օդ բարձրանալ։
