Դանիան, Ֆրանսիան, Գերմանիան, Իտալիան, Նիդերլանդները, Նորվեգիան, Իսպանիան, Շվեդիան և Մեծ Բրիտանիան պայմանավորվել են Ուկրաինայի հետ ստեղծել համատեղ հակաբալիստիկ կոալիցիա, հայտնել են Ֆրանսիայի նախագահ Էմանուել Մակրոնի գրասենյակից։
«Կարծում ենք՝ Եվրոպայի պաշտպանության համար անհրաժեշտ է գլոբալ լուծում՝ հրթիռային ապագա սպառնալիքների զսպման և հետմղման համար ինտեգրված ճարտարապետություն, որը կմշակվի համատեղ ջանքերով, տեխնոլոգիական բացությամբ և վստահելի արդյունաբերական համագործակցությամբ»,- ասված է տասը երկրների համատեղ հռչակագրում։
Նոր կոալիցիան մտադիր է սահմանել ընդհանուր օպերացիոն պահանջներ, համատեղ աշխատանքային խմբեր, հստակ պետական մեխանիզմներ և ճանապարհային քարտեզ՝ առաջին օպերացիոն կարողությունների ստեղծման համար։ Այլ պետություններ, որոնք կիսում են կոալիցիայի սկզբունքներն ու նպատակները, կարող են միանալ դրան։
Ուկրաինայի նախագահ Վլադիմիր Զելենսկին ժամանել է Փարիզ՝ հանդիպելու Ֆրանսիայի նախագահ Էմանուել Մակրոնի և «Կամեցողների կոալիցիայի» անդամների հետ։ Իր թելեգրամյան ալիքում նա ևս ընդգծել է, որ իր այցի գլխավոր թեման լինելու է հակաբալիստիկ ծրագիրը։
Վերջին շրջանում Զելենսկին պարբերաբար հայտնում է դաշնակիցներին, որ Ուկրաինային անհրաժեշտ է ավելի շատ հակաօդային պաշտպանություն՝ ռուսական բալիստիկ հարձակումները հետմղելու համար։ Անկարայում անցկացված ՆԱՏՕ-ի գագաթնաժողովի շրջանակում անցյալ շաբաթ ԱՄՆ նախագահ Դոնալդ Թրամփն ակնարկել էր, որ Կիևին, ըստ ամենայնի, «Patriot» համակարգերի հակահրթիռների արտադրության արտոնագիր կփոխանցվի։
