ԱՄՆ-ն Իրանի հետ բանակցություններ է վարում ամուր դիրքերից, և Թեհրանը հասկանում է դա, համոզված է ԱՄՆ նախագահ Դոնալդ Թրամփը։
Նա հիշեցրել է, որ Հորմուզի նեղուցը «արդեն բաց է», նաև վերահաստատել է իր համոզմունքը, որ «աշխարհը մեծ վտանգի մեջ կլիներ, եթե Իրանը միջուկային զենք ունենար»։
Շաբաթվա սկզբին Թրամփը հայտարարել էր, որ Միացյալ Նահանգները հաջողությամբ պաշտպանում է իր շահերը Իրանի հետ բանակցություններում, քանի որ, ըստ նրա, Իրանը «մեծ զիջումների» է գնում։ Ավելին, ամերիկացի առաջնորդը Հորմուզի նեղուցում իրավիճակը բնութագրել է լավ՝ նշելով, որ այն բաց է նավագնացության համար։
Թրամփը նաև Իրանն անվանել է ամերիկյան գյուղատնտեսական արտադրության արտահանման նոր շուկա՝ Թեհրանի ակտիվների սառեցման համաձայնագրի ֆոնին։
Հինգշաբթի The New York Post-ը, հղում անելով ամերիկացի բարձրաստիճան պաշտոնյայի, հաղորդել է, որ համաձայնագրի շրջանակներում ԱՄՆ-ում ապասառեցված իրանական միջոցները փաստացի չեն լինի Իրանի իշխանությունների տրամադրության տակ։ Վաշինգտոնը պնդում է, որ դրանք ուղղակիորեն կփոխանցվեն այն ընկերություններին, որոնցից Իրանը կարող է գնել գյուղատնտեսական ապրանքներ, բժշկական սարքավորումներ և այլ հաստատված ապրանքներ։ Սակայն Իրանի խորհրդարանի խոսնակ Մոհամմադ Բաղեր Ղալիբաֆը նույն օրը հայտարարել է, որ ակտիվների ապասառեցման դեպքում Թեհրանը չի ցանկանում դրանք օգտագործել ամերիկյան ապրանքներ գնելու համար:
Ըստ իրանական լրատվամիջոցների՝ Թեհրանը 12 միլիարդ դոլարը կստանա երկու տրանշով։ Թրամփն էլ վստահեցրել է, որ ԱՄՆ-ն դեռևս որևէ գումար չի վճարել Իրանին, նաև գումար չի փոխանցել նախկինում սառեցված իրանական միջոցներից:
