Ռուբիոն հերքում է, թե Իսրայելը փորձում է տապալել ԱՄՆ-Իրան գործարքը
Իսրայելին և Մերձավոր Արևելքում ԱՄՆ-ի մյուս դաշնակիցներին հայտնի է, թե որտեղ են անցնում ԱՄՆ նախագահ Դոնալդ Թրամփի կարմիր գծերը, որը ձգտում է իրականացնել Իրանի հետ ռազմական գործողությունների դադարեցման մասին պայմանավորվածությունները։ Այս մասին հայտարարել է ԱՄՆ պետքարտուղար Մարկո Ռուբիոն։
Քուվեյթում զրուցելով լրագրողների հետ՝ նա հերքել է, թե Իսրայելը փորձում է խաթարել Վաշինգտոնի և Թեհրանի միջև գործարքը։ «Գաղափար անգամ չունեմ, թե որտեղից եք դա վերցնում։ Մենք աշխատում ենք դրա վրա։ Իսրայելցիները հստակ գիտեն՝ ինչի վրա ենք մենք աշխատում։ Տարածաշրջանում մեր բոլոր գործընկերները գիտեն, թե ինչի վրա ենք մենք աշխատում։ Բոլորը հասկանում են, թե որոնք են նախագահ [Թրամփի] կարմիր գծերն ու դիրքորոշումներն այս հարցում»,- ասել է ամերիկյան արտաքին քաղաքական գերատեսչության ղեկավարը։ «Չգիտեմ, թե ինչ հրապարակումներ նկատի ունեք»,- հավելել է Ռուբիոն, որն այս օրերին շրջագայում է Մերձավոր Արևելքի երկրներով։
Մինչդեռ, ինչպես հունիսի 19-ին հայտնել է The Washington Post թերթը, ԱՄՆ հետախուզությունը զգուշացրել է Սպիտակ տանը, որ Իսրայելը, հավանաբար, քայլեր կձեռնարկի, որոնք կխաթարեն Իրանի հետ կայուն խաղաղություն կնքելու Թրամփի ջանքերը։
Վաշինգտոնն ու Թեհրանն օրերս փոխըմբռնման հուշագիր են ստորագրել, որը նախատեսում է ռազմական գործողությունների անհապաղ դադարեցում բոլոր ճակատներում, այդ թվում՝ Լիբանանում։ Հունիսի 21-22-ը շվեյցարական Բյուրգենշտոկ հանգստավայրում Դոհայի և Իսլամաբադի միջնորդությամբ տեղի են ունեցել ԱՄՆ-ի և Իրանի բանակցությունները՝ հուշագրի իրագործման շուրջ։ Ինչպես նշվել է Պակիստանի և Քաթարի համատեղ հայտարարության մեջ բանակցությունների առաջին փուլի ավարտից հետո, Իրանի և ԱՄՆ ներկայացուցիչների մասնակցությամբ հանդիպումն անցել է դրական և կառուցողական մթնոլորտում, ձեռք է բերվել հուսադրող առաջընթաց, այդ թվում՝ հիմք է ստեղծվել հետագա տեխնիկական խորհրդակցությունների անցկացման համար։
