«Ուժեղ Հայաստան» դաշինքի առաջին համար Նարեկ Կարապետյանի այսօրվա ասուլիսը ոչ թե հստակեցրեց դաշինքի դիրքորոշումները, այն թերևս ավելի շատ հարցեր առաջացրեց։
Խնդրո առարկան Նարեկ Կարապետյանի պնդումներն են Զանգեզուրի միջանցքի, իսկ, ըստ պարոն Կարապետյանի, ընդամենը ճանապարհի մասին, որոնք մեկին մեկ կրկնում են փաշինյանական թեզը, ինչպես նաեւ Նարեկ Կարապետյանի հայտարարությունը՝ Նիկոլ Փաշինյանի հաստատած, կրկին, ըստ նրա, անբեկանելի խաղաղության մասին, քանի որ ինչպես ինքն էր հարցազրույցում հայտարարել՝ խաղաղություն լինելու է։ Նրա ձևակերպմամբ՝ խնդիրը ոչ թե խաղաղության առկայությունն է, այլ այն, որ դա լինելու է «թույլ խաղաղություն» (հայտարարությունները՝ տե՛ս տեսանյութում):
Հայաստանյան ընդդիմադիր շրջանակները այս ողջ ընթացքում հայտարարել են «փաշինյանական խաղաղության» կեղծ և ստահոդ լինելու մասին՝ ասելով, որ Փաշինյանի իշխանությունը բերում է զիջումներ, կորուստներ և անխուսափելի պատերազմ։ Ընդդիմադիր գործիչները նաև պնդում էին, որ Սյունիքի ճանապարհը («Թրիփփ նախագիծը») ոչ այլ ինչ է, քան՝ միջանցք։
Ի տարբերություն ընդդիմադիր շրջանակների խոսույթի, Նարեկ Կարապետյանն այսօր գոնե թե այս երկու թեզերի մասով փաստացի համաձայնություն է հայտնել Փաշինյանի հետ։
Թերեւս՝ հարց առաջին
Հարգելի՛ պարոն Կարապետյան, խնդրում ենք պատասխանել՝ արդյո՞ք Նարեկ Կարապետյանի պնդումները «Զանգեզուրի միջանցքի», իսկ ըստ Կարապետյանի՝ ճանապարհի մասով, Ձեր դաշինքի պաշտոնական դիրքորոշումն են:
Հարց երկրորդ
Պարո’ն Կարապետյան, Դուք համաձա՞յն եք, որ Նիկոլ Փաշինյանը կարող է բերել խաղաղություն, անկախ նրանից՝ դա կլինի թույլ , թե ուժեղ։
Հուսով ենք, որ Ձեր պարզաբանումները կփարատեն ժողովրդի այն մտահոգությունները, որ այս հայտարարությունները ռեվերանս չեն իշխող «Քաղաքացիական պայմանագիր » կուսակցությանը՝ Նիկոլ Փաշինյանի գլխավորությամբ։
