Միջազգային ճանաչում ունեցող մշակութային գործիչ, բարերար և գործարար Կոնստանտին Իշխանովը պարգևատրվել է ՀՀ կրթության, գիտության, մշակույթի և սպորտի նախարարության մեդալով՝ երաժշտարվեստի ոլորտում ունեցած նշանակալի ներդրման, միջազգային մշակութային համագործակցության ամրապնդման, ինչպես նաև Հայաստանի պետական սիմֆոնիկ նվագախմբի հիմնադրման 20-ամյակի շրջանակներում։ Կոնստանտին Իշխանովի գործունեությունը տարիներ շարունակ էական ազդեցություն է ունեցել հայկական դասական երաժշտության միջազգային ճանաչման և տարածման գործում։
Նրա հետևողական աջակցության շնորհիվ կյանքի են կոչվել բազմաթիվ մշակութային նախաձեռնություններ, որոնց թվում առանձնահատուկ տեղ է զբաղեցնում «Արմենիա» միջազգային երաժշտական փառատոնը, որն իր մասնակցությամբ ձեռք է բերել լայն միջազգային հեղինակություն։ 2018 թվականին Իշխանովի նախաձեռնությամբ Մալթայում անցկացված Հայաստանի մշակույթի օրերը կարևոր քայլ դարձան հայկական արվեստի միջազգային ներկայացման և երկկողմ մշակութային կապերի խորացման ճանապարհին։
Նրա ղեկավարած միջազգային հեղինակավոր մրցույթներին տարբեր տարիների մասնակցել է նաև Հայաստանի պետական սիմֆոնիկ նվագախումբը՝ գեղարվեստական ղեկավար և գլխավոր դիրիժոր Սերգեյ Սմբատյանի ղեկավարությամբ։ Իշխանովի գործունեությունը միավորում է մշակութային ռազմավարությունը, միջազգային գործընկերային մտածողությունն ու արվեստին նվիրվածությունը՝ նպաստելով ժամանակակից մշակութային միջավայրի զարգացմանը։
Նա բազմաթիվ միջազգային փառատոների, մրցույթների և ակադեմիաների հիմնադիր ու նախագահ է, իսկ նրա ազդեցությունը դասական երաժշտության համաշխարհային տարածման գործընթացներում նշանակալի է։ 2019 թվականին Կոնստանտին Իշխանովը դարձավ առաջին ոչ մալթացի մշակութային գործիչը, որն արժանացավ Մալթայի բարձրագույն մշակութային պարգևին՝ երկրի մշակութային կյանքում բացառիկ ավանդի համար։
