Իսրայելի պաշտպանության բանակի խոսնակ, գնդապետ Ավիչայ Ադրաեն հանդես է եկել կոշտ հայտարարությամբ՝ մեղադրելով Լիբանանի զինված ուժերին «Հեզբոլլահի» զինաթափման հարցում միջազգային հանրությանը մոլորեցնելու և ստելու մեջ։ Ըստ Իսրայելի ռազմական գերատեսչության՝ մարտի 2-ից մեկնարկած ռազմական գործողությունների ընթացքում «Հեզբոլլահը» Լիտանի գետից հարավ ընկած տարածքներից արձակել է շուրջ 3000 հրթիռ և այլ արկեր։
Իսրայելական կողմը հիշեցնում է, որ սույն թվականի հունվարի 8-ին Լիբանանի բանակը պաշտոնապես հայտարարել էր զենքի առգրավման գործողության առաջին փուլի ավարտի մասին՝ պնդելով, թե հաջողությամբ զինաթափել է Լիտանի գետից հարավ ընկած գոտին։ Սակայն, ըստ Ադրաեի, վերջին օրերի տվյալները լավագույն ապացույցն են այն բանի, որ այդ հայտարարությունը բացահայտ սուտ էր, իսկ իրականացված գործողությունը՝ լիակատար ձախողում։
Իսրայելի պաշտպանության բանակի ներկայացուցչի պնդմամբ՝ սա վկայում է Լիբանանի պետական բանակի անկարողության կամ ցանկության բացակայության մասին՝ թույլ չտալու «Հեզբոլլահի» գրոհայինների և սպառազինության տեղաշարժը դեպի սահմանամերձ շրջաններ։ Իսրայելական կողմն ընդգծում է, որ Լիտանի գետից հարավ ընկած տարածքում ահաբեկչական ենթակառուցվածքների պահպանումը մնում է տարածաշրջանային անվտանգության գլխավոր սպառնալիքը։
