Իտալական լեգենդար սուպերմեքենա արտադրող Lamborghini-ն ամբողջությամբ հրաժարվել է էլեկտրական մեքենա արտադրելու իր ծրագրից և որոշել է կենտրոնանալ plug-in հիբրիդների վրա։ Պատճառը, ըստ ընկերության, հարուստ հաճախորդների շրջանում էլեկտրական մեքենաների նկատմամբ պահանջարկի նվազումն է։
Ընկերությունը դեռ 2023 թվականին ներկայացրել էր իր առաջին, ամբողջությամբ էլեկտրական կոնցեպտ-քարը՝ Lanzador-ը, սակայն այժմ այն այլևս չի նախատեսվում դնել սերիական արտադրության։
Ընկերության գլխավոր տնօրեն Ստեֆան Վինկելմանը նշել է, որ էլեկտրական մեքենաների զարգացումը կարող է դառնալ «թանկարժեք հոբբի» բրենդի համար, քանի որ իրենց հաճախորդների շրջանում մարտկոցով աշխատող մեքենաների ընդունումը «գրեթե զրոյի է մոտենում»։ Նրա խոսքով՝ Lanzador-ի փոխարեն կարտադրվի plug-in հիբրիդ, և մինչև 2030 թվականը Lamborghini-ի ամբողջ մոդելային շարքը բաղկացած կլինի միայն նման հիբրիդներից։
Այս որոշումը լուրջ շրջադարձ է ընկերության «կանաչ» ռազմավարության մեջ։ Դեռ 2021 թվականին Lamborghini-ն հայտարարել էր, որ նախատեսում է անցնել հիբրիդ և էլեկտրական սուպերմեքենաների արտադրության՝ այդ նպատակով ներդնելով 1.5 միլիարդ եվրո։ Սակայն այժմ ընկերությունը փաստացի ընտրել է հիբրիդային ճանապարհը՝ ամբողջությամբ էլեկտրական ապագայի փոխարեն։
