«Փաստ» օրաթերթը գրում է.
Մի հերթական «կարկառուն» քպական պատգամավոր երեկ ստիպված ընդունել է, որ աղքատության մակարդակի նվազեցման մասով «որոշակիորեն շեղվել են իրենց ծրագրից»։ Խոստացել էին կիսով չափ նվազեցնել աղքատությունը, սակայն աղքատության ցուցանիշը 26 տոկոսից հազիվ իջել է մինչև 21 տոկոս: Չնայած, դա էլ է կասկածելի, թե իջել է: Ավելին, նա չափազանց մեղմ է ներկայացնում, թե «որոշակիորեն» են շեղվել: Իրականում, ոչ մի խոստում չեն կատարել: Օրինակ՝ ԱԺ պատգամավոր, տնտեսագետ Թադևոս Ավետիսյանը մեզ հետ զրույցում նշում է, որ եթե տվել ես պայմանական 20 խոստում, ասում ես՝ 2-ը կատարել եմ, դրա համար այս 18-ը չեմ կատարում, դա նշանակում է, որ ուղղակի խաբում ես և ի սկզբանե խաբել ես։
«Իսկ ի՞նչ էին խոստացել։ Իրենք սոցիալական չափելի չորս խոստում էին տվել՝ երեք կետով ձևակերպված, բայց չորսն էլ չեն կատարել։ Ասել էին, որ նվազագույն աշխատավարձը պետք է դառնա 85 հազար դրամ, հիմա 75 հազար դրամ է։ Ասել էին, որ նվազագույն կենսաթոշակը պետք է դառնա պարենային զամբյուղի արժեքի չափ։ Հիմա նվազագույն կենսաթոշակը 36 հազար դրամ է՝ մոտ 7 հազար դրամով պակաս պարենային զամբյուղի արժեքից։ Ասել էին, որ միջին կենսաթոշակը պետք է դառնա նվազագույն սպառողական զամբյուղի արժեքին հավասար, միջին կենսաթոշակը մոտ 50 հազար է, նվազագույն սպառողական զամբյուղի արժեքը՝ 80 հազար, տարբերությունը 30 հազար դրամ է։
Այս խոստումները շատ ուղիղ ձևակերպված են, այդ թուղթը հանրամատչելի է, ցանկացած մեկը կարող է կառավարության հնգամյա ծրագրում դա կարդալ և տեսնել, որ խաբել են, այսինքն՝ չեն կատարել խոստումները»,-ասում է Ավետիսյանը։ Բայց նորից վերադանանք «կարկառուն» քպականին: Ասում է, դե, իրենք ընտրողներին պատասխան կտան: Իսկ ի՞նչ պատասխան պիտի տան, երբ ակնհայտ է, որ խոստացածը չեն արել: Ու քանի որ պատասխան չունեն, սկսում են «կրուտիտներ» մոգոնել, կարճ ասած՝ փչել, օդ տատանել, քամի անել: Մյուս կարկառուն քպականն էլ, այս դեպքում՝ նախարար, հայտարարում է, թե... միտինգներ էին, դա անկայունություն էր բերում, իսկ տնտեսությունն ու ներդրումները սիրում են կայունություն:
Ու քանի որ միտինգներ էին, այս իմաստության ակունքի ասածի համաձայն՝ տնտեսությունը դոփում էր տեղում, քաղաքական անկայունությունից ցնցվում էր, դրա պատճառով էլ աղքատությունը չի նվազել, չի կրճատվել: Եթե որևէ եվրոպական երկրում որևէ իշխանավոր հանրությանը նման պատճառաբանություն ներկայացնի, պատկերացնո՞ւմ եք՝ հասարակությունն ինչ օրը կգցի այդ պաշտոնյային: Բայց սա Հայաստանն է, որտեղ իշխանության է ՔՊ-ն, ու, բնականաբար, իրենց ձախողումների համար պիտի հերթական մեղավորները գտնեն: Այս դեպքում՝ այդ «մեղավորն» ընդդիմությունն է՝ իր հանրահավաքներով: Սակայն էլի չի «կպնում»: Նախ՝ ութ տարի է արդեն, ինչ ամբողջ ՔՊ իշխանաթիմով, Փաշինյանի գլխավորությամբ, երկիրը մի ցնցումից մեկ այլ ցնցման մեջ ենք գցում, անկայունությունն անկայունության վրա են հրահրում, ու հիմա ումի՞ց եք բողոքում:
Ում գրպանն են ուզում նետել իրենց հրահրած ցնցումներն ու վայրիվերումները: Հենց այս իշխանության ղեկավարումն ու ղեկավարել չկարողանալն են անկայունություն ձևավորում, նրանց բերած փորձանքներն են անկայունություն ձևավորում, այլ ոչ թե հանրահավաքները: Երկրորդ. քպական նախարարի նշած միտինգների շրջանում, կապված ռուս-ուկրաինական հակամարտության հետ, Հայաստանում տնտեսական որոշակի վերելք է եղել, ֆինանսական չնախատեսված ներհոսք ու եկամուտներ: Էհ, ոչ թե ձեզ միլիոններով պարգևատրեիք, այլ աղքատությունը կրճատեիք:
Դուք ձեզ 6 կամ 7 միլիոն դրամ Ամանորյա պարգևատրում եք դուրս գրում, թոշակառուներին ու նվազագույն վարձատրության վրա «նստած» մարդկանց կոնֆետի թղթի ճռճռոցը ցույց տալի՞ս: Երրորդը. միտինգների վերջին ընդգրկուն ու տևական դրսևորումը եղել է 2024-ի ամռանը: Անցյալ տարի էլ՝ 1-2 անգամ, Սամվել Կարապետյանի ապօրինի կալանավորման հետ կապված: Թե բա՝ միտինգներն են մեղավոր: Դուք սա լո՞ւրջ եք ասում: Լուրջ, լո՞ւրջ եք ասում: Ի դեպ, ցանկացած երկրում էլ հանրահավաքներ են լինում, անգամ՝ անհնազանդություններ, հուզումներ, անկարգություններ: Ասենք, Ֆրանսիայում:
Մի անգամ չտեսանք, որ մի ֆրանսիացի նախարար նման «կրուտիտներով» հանդես գար լրագրողների առաջ: Ձախողել եք ամեն ինչ, ասեք՝ ձախողել ենք...
Մանրամասները՝ «Փաստ» օրաթերթի այսօրվա համարում:
