ՀՀ երրորդ նախագահ Սերժ Սարգսյանը հայտարարել է, որ այս պահին TRIPP-ում ռիսկեր չի տեսնում, միաժամանակ ասել է, որ չի հասկանում, թե դա ինչ է. «Ադրբեջանցիները, թուրքերը, ՀՀ հանրության մի մասը դա անվանում են միջանցք, իսկ իշխանությունները՝ անվտանգության երաշխիք: Բայց իշխանության ասածները հաճախ են փոխվում»,- նշել է նա՝ հավելելով,- «Երբ ծանոթանանք փաստաթղթի կարգավիճակին, կասեմ՝ ռիսկ տեսնում եմ, թե ոչ»:
Նա, միաժամանակ, բացառել է որևէ փաստաթուղթ կարող է խաղաղության երաշխիք լինել․ «Երաշխիք կարող են լինել պաշտպանական կառույցները»:
Անդրադառնալով առաջիկա խորհրդարանական ընտրություններին, Սարգսյանը նշել է, որ չի ուզում ներքաշվել նախընտրական մարաթոնի մեջ ու գնահատականներ տալ․ «Մի քանի ամիս ունենք, որը քիչ չէ»:
Ս. Սարգսյանը հայտնել է, որ չեն քննարկել ՀՀԿ-ի՝ դաշինքով մասնակցելու տարբերակը․ «Կարծում եմ՝ հնարավոր չէ այդ տարբերակը»:
Իր իշխանության ժամանակ դատարաններին պատվեր տալու ու քաղբանտարկյալների առկայության մասին խոսակցությունները Սարգսյանը սխալ է համարում․ «Փորձում են հավասարության նշան դնել հիմիկվա հետ, բայց չկար էդպիսի բան»:
Ինչ վերաբերում է եկեղեցուն պաշտպանելու հնարավոր քայլերին, նա նշել է. «Եկեղեցին հնարավորություն ունի իր խոսքն ու կարծիքն ասել ու իր ներքին կանոնակարգով լուծել հարցերը: Ի՞նչ եք ուզում, ավտոմատ վերցնենք, գնա՞նք»:
