Կարգալույծ հռչակված Գևորգ եպիսկոպոս Սարոյանը (Արման Սարոյան` ավազանի անունով) չի պատրաստվում լքել Մասյացոտն թեմի առաջնորդարանը։
Eouromedia24-ի տեղեկություններով Փաշինյանի շուրջ ձևավորված շարժմանն առաջիններից միացած կարգալույծ հռչակված Սարոյանը չի պատրաստվում լքել Մասիսում գործող Մասյացոտնի թեմի առաջնորդարանը, նրա անվտանգությունը շարունակում է վերահսկվել ոստիկանության գվարդիայի կողմից՝ երկու ավտոմեքենայով։
Ավելին՝ այսօր նա անձամբ ներկայացել է առաջնորդարան։ Ներկայումս նրա շրջապատում մնացել է միայն մեկ կողմնակից քահանա, մոմավաճառը և իր վարորդը, որը, ինչպես նշվում է, նրա քրոջ ամուսինն է։
Նա առաջնորդարան է գնացել հոգևորականի վեղարով՝ դրանով ցույց տալով, որ ինքը արհամարհում է իրեն օծած և իրեն կարգալույծ արած Վեհափառ Հայրապետի որոշումը։
Զուգահեռաբար կեսօրից սկսած՝ Սարոյանը անհանգստություն է ունեցել և սկսել է հեռախոսազանգեր կազմակերպել տարբեր ուղղություններով՝ պարզելու համար, թե ինչ քայլեր է պլանավորում Մայր Աթոռ Սուրբ Էջմիածինը իրեն առաջնորդարանից դուրս բերելու հարցում։
Ստեղծված իրավիճակը վկայում է՝ Արման Սարոյանը գործում է Նիկոլ Փաշինյանի հրահանգով և երաշխավորությամբ, սակայն միաժամանակ ունի ներքին վախեր՝ վերջնականապես պախարակվելու առնչությամբ։ Աղբյուրի փոխանցմամբ՝ նա իր ներսում քննարկում է հաջորդ քայլերի հնարավոր սցենարները։
