Միացյալ Նահանգները նախատեսում է ամերիկացի գեներալ նշանակել Գազայի հատվածում ապագա միջազգային կայունացման ուժերի հրամանատար, որոնց ստեղծումը նախատեսված է ԱՄՆ նախագահ Դոնալդ Թրամփի խաղաղության ծրագրում: Այս մասին հաղորդում է Axios-ը՝ հղում անելով աղբյուրներին:
ՄԱԿ-ում ԱՄՆ մշտական ներկայացուցիչ Մայք Վալցը, Իսրայել կատարած իր առաջին պաշտոնական այցի ժամանակ, երկրի վարչապետ Բենիամին Նեթանյահուին ասել է, որ անձամբ ճանաչում է այս գեներալին և նշել, որ «նա շատ լուրջ մարդ է»։
Վալցը նաև վստահեցրել է Իսրայելի կառավարության ղեկավարին, որ ամերիկացի հրամանատարի նշանակումը պետք է երաշխավորի հրեական պետության շահերը հետագա կարգավորման գործընթացի ընթացքում։
Axios-ի աղբյուրները նաև նշում են, որ ԱՄՆ-ն ներկայումս գտնվում է կայունացման ուժերի ստեղծման վերջնական փուլում: Այնուամենայնիվ, ամերիկյան զորքերը անմիջականորեն չեն մասնակցի Գազայում անվտանգության ապահովմանը:
Ավելի վաղ Axios-ը, հղում անելով աղբյուրներին, հայտնել էր, որ ԱՄՆ-ը բանակցություններ է վարում մի քանի երկրների հետ Գազայի հատվածում միջազգային կայունացման ուժեր ստեղծելու վերաբերյալ։ Դրանց մեջ կարող են ներառվել Ադրբեջանի, Եգիպտոսի, Ինդոնեզիայի և Թուրքիայի ներկայացուցիչներ, ինչպես նաև պաղեստինյան ոստիկանության ստորաբաժանումներ։
