Առնվազն 65 մարդ է զոհվել Գազայի հատվածում Իսրայելի կողմից հրադադարի խախտմանը հաջորդած ավիահարվածների հետևանքով, հաղորդում է «Ալ Արաբիան»՝ հղում անելով պաղեստինյան անկլավի արտակարգ ծառայությունների աղբյուրներին։
Ըստ «Ալ Ջազիրա»-ի՝ հարվածների հետևանքով զոհվել է ավելի քան 20 երեխա։ Հաղորդվում է, որ թիրախ են դարձել նաև բնակելի շենքերը և փախստականների ճամբարները, որտեղ բնակվում են տեղահանված Գազայի բնակիչները։
Երեքշաբթի օրը Իսրայելի բանակը մի շարք ավիահարվածներ է հասցրել Գազայի հատվածին: Իսրայելի վարչապետ Բենիամին Նեթանյահուն մեղադրել է Համասին հրադադարը խախտելու և անկլավի հարավային մասում գտնվող Ռաֆահի տարածքում իսրայելական զորքերի վրա հարձակվելու մեջ:
Համասը, իր հերթին, հետաձգել է Գազայի հատվածում սպանված իսրայելցի պատանդի մասունքների հանձնումը, որը նախատեսված էր հոկտեմբերի 28-ի երեկոյան՝ վկայակոչելով Իսրայելի կողմից համաձայնագրի խախտումները: Շարժումը նաև հերքել է Ռաֆահում տեղի ունեցած կրակոցների միջադեպին իր մասնակցությունը:
