Ներկայացնում ենք «Մեր ձևով» շարժման կողմից կազմակերպված հանրահավաքում շարժման համակարգող Նարեկ Կարապետյանի ելույթը.
«Մենք գտնվում ենք Հայաստանի Ազատության հրապարակում։ Ինչո՞ւ ենք այսօր այստեղ կազմակերպել մեր հավաքը։ Հայաստանի Ազատության հրապարակում սկիզբ են առել մեր պատմության շատ կարևոր շարժումներ։ Առաջինը՝ այստեղ է սկսվել Ղարաբաղյան շարժումը, երկրորդը՝ այստեղ է սկսվել Հայաստանի անկախ ազատախոհության շարժումը, և երկու շարժումներն էլ մեր հայրերը հասցրել են դեպի հաղթանակ։
Այսօր մենք՝ «Մեր Ձևով» շարժման անդամներս և կամավորներս, սկսում ենք երրորդ շարժումը՝ Հայաստանի վատ շրջանի ավարտի և վերակառուցման շարժումը։
Շատերը, ովքեր այստեղ են, հարցնում են, թե ինչպե՞ս ենք հասնելու այդ վերակառուցմանը, եթե կա իշխանություն, որը գնում է բոլորովին ուրիշ ճանապարհով։ Ես առաջարկում եմ ձեզ երեք քայլ, մեր ծրագիրը, թե ինչպես հասնենք խաղաղ իշխանության փոփոխության, ինչպես Քաղաքացիական պայմանագիր կուսակցությանը երկրորդ-երրորդ անգամ սարքենք ընդդիմություն։
Իշխանափոխության եռաքայլ ծրագիր
Քայլ 1. Պատրաստվել ընտրություններին
Մենք պետք է բոլորս պատրաստ լինենք, աշխատենք և գնանք դեպի ընտրություններ։ Մենք տեսնում ենք, որ հայ ժողովուրդը ունի հնարավորություն արդար ընտրություններով, լավ աշխատանքով, իշխանությունից հեռացնել այս խմբակին։
Շատերը կասեն. «Նարեկ ջան, ինչպե՞ս ենք մենք իշխանությունից հեռացնելու նրանց, եթե նրանք ունեն պետական ռեսուրսներ, ճնշումներ են գործադրելու, մարդկանց ստիպողաբար տանելու են ընտրելու»։ Ես կարող եմ ասել այդ ժամանակ, որ հաղթանակը պետք է լինի այնպես, որ իրենց ստիպողաբար ընտրած 10-20 հազար մարդկանց ձայները վերջնական արդյունքի վրա տարբերություն չտան։ Այսինքն՝ Քաղաքացիական պայմանագիր կուսակցության պարտությունը լինի անվերապահելի։
Քայլ 2. Տարածել ճշմարտությունը
Ի՞նչ պետք է բոլորս անենք դրա համար։ Ամեն մեկս, ովքեր այստեղ են, գիտեմ, որ շատ մարդիկ իրենց գործը թողել, եկել են այստեղ, որպեսզի լսեն կարևոր հարցերի պատասխան։ «Լավ, ի՞նչ անենք, որպեսզի այդ օրը մեկ օր շուտ գա, ի՞նչ ես դու առաջարկում»։ Շատ շարժումներ են եղել մեր հայրենիքում, որոնք ինչ-ինչ պատճառներով չեն հաջողվել։
Իմ առաջարկը մի բանն է. այստեղ կան տասնյակ հազար մարդիկ, տասնյակ հազար Հայաստանի քաղաքացիներ։ Բոլորս և ամեն մեկս, եթե աշխատենք ակտիվ և խոսենք մեր շրջապատի հետ, բոլորի հետ պետք է մեր շրջապատում խոսել, բոլորին պատմել ճշմարտությունը, համբերատար հարևանների, բարեկամների, բոլորի հետ։ Խնդրում եմ, սա է ճիշտ ճանապարհը։ Խոսեք, պատմեք, բացեք այդ մարդկանց աչքերը, որովհետև այն, ինչ մենք գիտենք, հնարավոր է այդ մարդիկ չգիտեն։
Եթե այստեղ գտնվող տասնյակ հազար մարդկանցից ամեն մեկը երեք հոգու աչքերը կարողանա բացել, որ նրանք ճիշտ քաղաքացիական դիրքորոշում ունենան, ես վստահեցնում եմ՝ մի քանի ամիս հետո մեր հասարակությունում իրավիճակը կատարյալ փոփոխված է լինելու և այս իշխանությունը շանս չունի մնալու։
Եվս մեկ անգամ, խոսենք, շփվենք, իրազեկենք մեր հարազատներին, մեր բարեկամներին, մեր հարևաններին, պատմենք նրանց ճշմարտությունը, և դա է այն աշխատանքը, այն խաղաղ պայքարը, որ այստեղ գտնվող յուրաքանչյուր մարդ կարող է անել։ Այս հրապարակում է իշխանափոխության ոգին նետված, այս հրապարակն է որոշելու իր աշխատանքով՝ իշխանափոխություն կլինի, թե ոչ։
Քայլ 3. Կառուցել ապագան
Ես պլանավորում եմ պատմել ձեզ, թե ինչ կլինի նաև իշխանափոխությունից հետո, որպեսզի մենք մի խնդրից դուրս չգանք և նոր խնդրին չբախվենք։
Առաջինը պետք է լինի խաղաղ աշխատանք, կայուն երկիր։ Մենք՝ երկրի ղեկավարներս, պետք է ամեն օր միայն գործով զբաղվենք, մի օր շուտ վերացնենք աղքատությունը մեր երկրում։ Մեր երկրում այսօր 500 հազար մարդ գործ չունի շրջաններում։ Եթե մենք աղքատության դեմ չենք պայքարում, տարիներով մենք գտել ենք մեղավորներ մեր աղքատության մեջ և պայքարել ենք այդ մեղավորների դեմ, բայց պետք է ոչ թե մեղավորների դեմ պայքարենք, այլ աղքատության դեմ։ Ամեն օր ամբողջ պետական համակարգը պետք է պայքարի, որպեսզի օր առաջ Հայաստանը 21-րդ դարում հաղթի աղքատությանը։
Բոլոր շրջանները՝ Երևանի բոլոր վարչական շրջանները, Հայաստանի բոլոր շրջանները պետք է ունենան զարգացման ծրագրեր։ Մի շրջանը՝ արդյունաբերական, մի շրջանը՝ զբոսաշրջային, մի շրջանը՝ գյուղատնտեսական։ Երևանն էլ պետք է ունենա իր զարգացման տասնամյա պլաններ, որ ամեն օր մենք իմանանք՝ ո՞ւր ենք շարժվում։ Թե չէ այսօր մենք ապրում ենք Facebook-ի պոստից Facebook-ի պոստ, մեր արտաքին և ներքին քաղաքականությունը որոշվում է Facebook-ով։
Եզրափակում
Իշխանափոխությունից հետո նաև մենք խոսք ենք տալիս, որ «Քաղաքացիական պայմանագիր» կուսակցությանը կտանք երկու պաշտոն. առաջինը՝ ճանապարհաշինարարության պաշտոնը, որ սիրում են ասֆալտ անել, և երկրորդը՝ սիրում են ասֆալտին փռել։ Իրենց մոտ երկու բան է ստացվում՝ ասֆալտ անել ու ասֆալտին փռել։ Ինձ թվում է՝ իրենք գոհ կլինեն, քանի որ իրենց կյանքում մեծ բան չի փոխվի դրանից հետո, որովհետև հիմա էլ դրանով են զբաղված։
Նաև կուզեմ ասել այն, ինչ կատարվում է եկեղեցու հետ։ Մեզ մի բան չի՞ հիշացնում այն, ինչ կատարվում է մեր եկեղեցու հետ։ Հիշո՞ւմ եք, իշխանության գալուց հետո սկսվեցին բանակի հանդեպ ինչ-որ պրոցեսներ։ Ասվեց, որ սպաները և գեներալները կոռումպացված են, քաջ չեն, չեն կռվում։ Մի քանի տարվա ընթացքում տասնյակ սպաներ և գեներալներ հեռացվեցին բանակից։
Եվ այն ժամանակ էլ նույն ձեռագիրն էր։ Ասում էր՝ սպան լավը չի, գեներալը լավը չի, զինվորը լավն է։ Հիմա ասում են՝ սրբազանները, մեր սրբազանները, մեր եկեղեցու սրբազանները լավը չեն, քահանան լավն է։ Հակադրություն են ստեղծում, քանի որ մեր երկրում ուրիշ հակադրություն չեն կարող ստեղծել։ Մեր երկիրը 95%-ով առաքելական եկեղեցու հետևորդ է, 98%-ով հայ ազգի ներկայացուցիչներ են այստեղ ապրում, և որևէ ուրիշ հակադրություն Հայաստանում, բացի ղեկավար և ոչ ղեկավար հակադրության, նրանք չէին կարող ստեղծել։ Այդ իսկ պատճառով նրանք ստեղծել են այս հակադրությունը, որպեսզի կարողանան քանդել այս կառույցները։
Հիմա ձեզ հարց եմ տալիս. մեր այսօրվա բանակից է՞ Ադրբեջանն ավելի շատ վախենում, թե՞ յոթ տարի առաջվա։ Նույնն էլ եկեղեցու հետ է լինելու։ Դուք պատկերացնո՞ւմ եք ՔՊ-ացված եկեղեցի։ Պատկերացնո՞ւմ եք՝ նրանք ուզում են եկեղեցին սարքել հարսանիք անող կառույց, բայց եկեղեցին մեր ազգապահպանության հիմնասյունն է, ու դա նրանց մոտ չի հաջողվի։ Մեր եկեղեցին անպաշտպան չի, մեր եկեղեցու պաշտպանները այս հրապարակում տասնյակ հազարավոր մարդիկ են։
Նաև շատերը հարցեր են տալիս, ասում են՝ լավ, բոլոր քաղաքական ուժերն էլ խոստացել են, բոլոր ղեկավարներն էլ խոստացել են, որ մենք ապրելու ենք ավելի բարեկեցիկ երկրում։ Լավ, ձեր առաջարկն ու ուրիշների առաջարկը ինչո՞վ է տարբերվում։ Ասեմ՝ ինչով է տարբերվում մեր առաջարկը։ Պատկերացրեք՝ Քաղաքացիական պայմանագիր կուսակցության ղեկավարը, «Հայկական ժամանակ»-ի գլխավոր խմբագիրը, քանի՞ հոգու, քանի՞ մարդու կյանք է բարեկեցիկ դարձրել մինչև վարչապետ դառնալը։ Հինգ, չորս, երեք, քանի՞ մարդու է նա կարողացել բարեկեցիկ սարքել։ Իսկ քանի՞ մարդու է կարողացել Սամվել Կարապետյանը…
Շնորհակալ եմ բոլորից։ Ուզում եմ ասել, որ մեր պայքարը լինելու է խաղաղ, բայց հետևողական։ Մենք հետևողական գնալու ենք առաջ։ Ինչքան հետևողական հարձակվեն մեր եկեղեցու վրա, այնքան հետևողական էլ մենք կպաշտպանենք մեր եկեղեցին։ Ինչքան հետևողական փորձեն ինչ-որ ձև թուլացնել մեր հասարակության ակտիվ մասին, այդքան հետևողական էլ մենք ցույց կտանք մեր ուժը և միասնականությունը։
Շնորհակալ եմ», -ասված է ելույթում։
