ԱՄՆ նախագահ Դոնալդ Թրամփը հաջողությամբ անցել է բժշկական զննումը, որը ցույց է տվել, որ նա գտնվում է բացառիկ ֆիզիկական վիճակում։ Այս մասին ասվում է Թրամփի բժշկի զեկույցում, որը ուրբաթ օրը հրապարակել է Սպիտակ տան մամուլի ծառայությունը։
Փաստաթղթի համաձայն՝ Թրամփը «հաջողությամբ անցել է պլանային բժշկական զննում» Վաշինգտոնի արվարձանում գտնվող Ուոլթեր Ռիդի անվան ռազմական բժշկական կենտրոնում։
«Այցի ընթացքում անցկացված համապարփակ լաբորատոր հետազոտությունները ցույց տվեցին գերազանց արդյունքներ», - նշել է ԱՄՆ նախագահի բժիշկը՝ բացատրելով, որ Թրամփի «նյութափոխանակության, արյունաբանական և սրտային պարամետրերը» մնում են կայուն: Ավելին, «իր միջազգային ուղևորության նախօրեին» նա ստացել է գրիպի և COVID-19-ի դեմ պատվաստումներ:
«Նախագահ Թրամփը շարունակում է ցուցաբերել գերազանց ընդհանուր առողջական վիճակ», - նշել է ամերիկացի առաջնորդի բուժող բժիշկը, ով ասել է, որ Թրամփի «սրտաբանական տարիքը» «մոտավորապես 14 տարով փոքր է իր իրական տարիքից»։
«Նախագահ Թրամփը գտնվում է բացառիկ ֆիզիկական վիճակում՝ ցուցաբերելով սրտանոթային, շնչառական, նյարդային և մկանային-կմախքային համակարգի բարձր մակարդակներ», - ընդգծվում է բժշկի զեկույցում։
